Hadısha Adaı: Elge oralý ár qazaqtyń armany

Foto jeke qorynan

Táýelsizdik qarsańynda atamekenge oralǵan qandastardyń tynys-tirshiligin bilý redakııanyń maqsaty. Búgin qandastar.kz Irandaǵy kóshti bastap kelgen Hadısha Adaımen tildesti.

Onyń aıtýynsha, elge oralý shalǵaıda júrgen árbir qazaqtyń armany. Keıipkerimiz de bala kezden Qazaqstanǵa tabanym tıip, qutty qonys tapsam dep armandaǵan.

«Kóshý ózimniń ǵana emes, balalarymnyń bolashaǵyn jarqyn etýge múmkindik beretinin tolyq sezindim. Sodan bolar, Qazaqstanǵa kóshýge yqylas tanytqan sátte birge saparǵa shyqqan árbir otbasy eldiń erteńine senimmen qarady. Osylaısha 20 otbasy bolyp elge kelip, jańa ortaǵa úırenistik. Qazir Petropavl oblysy Esil aýdanyna qarasty Petrovka aýylynyń turǵynymyz», – deıdi ol.

Hadıshaǵa bastapqyda qonys aýdarýǵa tórt aımaq usynylǵan. Olardyń qatarynda Semeı, Kókshetaý, Petropavl, Pavlodar, Qostanaı sekildi qalalar bar. Keıbirinde baspana ázir bolmasa, keıbir qalanyń aýa-raıy, tabıǵaty jaqpaǵan. Keıin oılana kele Soltústik Qazaqstanǵa toqtalypty. Tańdaýdyń sebebi, aýylda mal sharýashylyǵymen aınalysýǵa barlyq jaǵdaı jasalǵan kórinedi. Onyń ústine Irannan qoıdyń júnin ıiretin qurylǵyny qosa ákelipti.

Keıipkerimizge «Qazaqstan siz kútkendeı qarsy aldy ma? degen mańyzdy suraq qoıǵan edik.

«Bul saýal meni túrli sezimge jeteleıdi. Keı tusta kóńilge kirbiń túsken sát bolǵanmen, sanamdaǵy qazaq uǵymy esh ózgerissiz qaldy. Kelgen sátte kvota bólý, kásip bastaýǵa grant berý, jumysqa ornalastyrý sekildi sharalar da báseńdep qaldy. Oqý bitirgenin rastaıtyn dıplomyn ákelmegen nemese zańdy mamanmen bekitilmegen azamattar kúndelikti jumys istep kún kórýde. Qandastardyń turaqty jumysy bolmaǵandyqtan keıde azyq-túlikke qarjysy bolmaı qalady. Ondaı sátte aýyl turǵyndary, ákimdik ókilderi, qaıyrymdy jandar járdemdesip, barynsha kómek qolyn sozyp keledi. Degenmen, jumyspen qamtý máselesi ońalmaı, jaǵdaıdyń qalypqa kelmesi belgili»,  – deıdi H.Adaı.

Keıipkerimiz til máselesine kelgende túıtkil joǵyn alǵa tartyp otyr. «Balalarym oqýǵa qushtar. Eki balam aǵylshyn, parsy tilderin jetik biledi. Qazaq tilin de úırenip keledi. Iranda qazaqsha sóılesip, oı bólisetin ortanyń joqtyǵy birshama kedergi keltirgen edi. Qazir qatarlastarymen áńgime aıtyp, til úırenýdi bir izge túsirdi», – deıdi ol.

P.S  Iranda 200-den asa qazaq otbasy qalǵanyn bildik. Olar da múmkindik bolsa elge kelýdi oılaıdy.  Jol shyǵyny, qujattardy aýdarý, bekitýge ketetin shyǵyndy kóptiń qaltasy kótermeıdi. Bılik qansha jerden kómek kórsetkenimen otbasynyń qarjy qory jınaqtalmasa, jańa ortada ómir súrý jeńil emes ekeni túsinikti.