«حايپ ءۇشىن»: ناركەنجە سەرىكباەۆا فيلارمونيا باسشىسىمەن نە سەبەپتەن تاتۋلاسقانىن ايتتى

ءداستۇرلى ءانشى ناركەنجە سەرىكباەۆا ءوزىنىڭ Instagram-داعى پاراقشاسىندا ءوزى قىسىم كورگەن باسشىسىمەن نە سەبەپتى تاتۋلاسقانىن ايتىپ بەردى, دەپ حابارلايدى Qandastar.kz اقپارات پورتالى.

ونىڭ ايتۋىنشا, كوزىنەن شىققان ىستىق جاس ىشكى جان ايقايى.

«ومىرگە ساۋال!

قايىرلى كەش جاناشىرلارىم!
3 كۇننەن بەرى بولىپ جاتقان جاعدايلاردان حاباردارسىزدار. بوسقا جىلاپ ۇپاي جينايتىن مەن ەمەس. كوزىمنەن شىققان جاس ول مەنىڭ ىشكى جان ايقايىم. ءالسىز جاراتىلىسپىن. الەۋمەتتىك جەلىدەگى ءار ءتۇرلى ايتىلىپ جاتقان سىني پىكىرلەردى دە قولداۋ حاتتاردى دا ءبىرىن قالدىرماي وقىپ وتىرمىن. وقي وتىرىپ جۇرەگىم قارس ايرىلارداي كۇي كەشكەنىم جاسىرىن ەمەس. “حايپ ءۇشىن”, “نەگە اياعىنا دەيىن بارمادىڭ”, “جالا جاپتىڭ”, “ەكى جۇزدىلىك” ت.ب دەگەن سياقتى پىكىرلەردى دە كورىپ كوزىمنىڭ جاسى كولدەي بولدى. مەيلى. كوپتىڭ اۋزىنا قاقپاق بولا المايمىن. اركىمنىڭ ءوز شىندىعى بار. بىراق ءبىر نارسە انىق. مەن حالىقسىز ەشكىم ەمەسپىن! ەلدىڭ ىشىنەن شىقتىم. اكەم دە حالىق, انام دا حالىق! كەشە شىمقالاعا مەن ءۇشىن ۋايىمداپ كەلگەن اعا, اپكەلەرگە, دوستارعا راحمەت! تاكاپپارلىق قىلماي, كەشىرىم سۇراپ تۇرسا اكەڭنىڭ بولسا دا قۇنىن كەش دەگەن قازاقتاي دانا جۇرتتىڭ جۇرناعىمىز عوي. كىسىلىك قىلماي, كىشىلىك تانىتايىن دەدىم. ماقساتىم از قازاقتى الاۋىز قىلۋ ەمەس! وسى ورايدا بەكەت ەسەنتاەۆ كوكەمىزدىڭ ءانى مەن سوزىنە جازىلعان “ ومىرگە ساۋال” اتتى تۋىندى نازارلارلارىڭىزعا ۇسىنامىن. مىنا ءاندى تىڭداپ مەنىڭ جان دۇنيەمدى تۇسىنەرسىزدەر… ءبارى ۋاقىتتىڭ ەنشىسىندە… قالعانى ىشىمدە قالا بەرسىن…. تىڭدارماندارىم مەن سىزدەردى جاقسى كورەمىن! مەن قولداپ, قۋاتتاپ, قولپاشتاپ وتىراتىن ەلىمە سەنەمىن!», — دەپ جازدى ول.