حالىق ءارتىسى بيبىگۇل تولەگەنوۆانى Air Astana قىزمەتكەرى ىڭعايسىز جاعدايعا قالدىرعان

فوتو: ازاتتىق رۋحى

حالىق ءارتىسى بيبىگۇل تولەگەنوۆاعا اۋە كەمەسىنە وتىرعىزۋ كەزىندە Air Astana قىزمەتكەرى دورەكىلىك كورسەتكەن. بۇل تۋرالى لەكا ساۆەلەۆا ەسىمدى جەلى قولدانۋشىسى مالىمدەپ, پرەزيدەنت قاسىم-جومارت توقاەۆقا ۇندەۋ جاسادى, دەپ حابارلايدى Malim.kz.

«2024 جىلدىڭ 3 قىركۇيەگىندە ساعات 10:30-دا استانادان الماتىعا ۇشاتىن ەير استانا 852 رەيسىندە قوعامنىڭ قايدا بارا جاتقانىن ويلاندىراتىن ءبىر جاعداي بولدى. كسرو حالىق ءارتىسى جانە قازاقستاننىڭ حالىق ءارتىسى, اڭىزعا اينالعان ءانشى بيبىگۇل تولەگەنوۆا Air Astana اۋە كومپانياسىنىڭ قىزمەتكەرى تاراپىنان دورەكىلىك پەن قۇرمەتسىزدىككە تاپ بولدى. بيبىگۇل احمەتقىزىن مۇگەدەكتەر ارباسىندا ۇشاق بورتىنا وتكىزبەك بولعاندا اۋە كەمەسىنە ءوتۋدى باقىلايتىن قىزمەتكەر توقتاتىپ, ارباداعى جولاۋشىلاردىڭ ءبىرىنشى بولىپ نەمەسە ەڭ سوڭعى جولاۋشى وتكەننەن كەيىن عانا ءوتۋى كەرەكتىگىن دورەكى تۇردە ەسكەرتكەن.

مۇگەدەكتەر ارباسىنداعى جولاۋشىلار ۇشاققا وتىرعىزۋ كەزىندە باسقا جولاۋشىلارعا ىڭعايسىزدىق تۋدىرماۋى كەرەك. بيبىگۇل احمەتقىزى مۇگەدەكتەر ارباسىمەن تەك ۇشاقتىڭ كىرەبەرىسىنە دەيىن جەتۋى ءتيىس ەدى, ءارى قاراي ول ەكىنشى قاتارداعى ورنىنا ءوز بەتىنشە بارعىسى كەلگەن, بۇل باسقا جولاۋشىلارعا كەدەرگى كەلتىرمەيتىن ەدى. سونىمەن قاتار, سول ساتتە جولاۋشىلاردىڭ كىرەبەرىستە توپتاسۋى بايقالمادى جانە اربامەن ۇشاقتىڭ كىرەبەرىسىنە دەيىن كەدەرگىسىز جىلدام جەتۋگە بولار ەدى. ايتا كەتۋ كەرەك, بيبىگۇل احمەتقىزىنىڭ ومىرتقاسىنىڭ دەرتى بار جانە وعان مۇگەدەكتەر ارباسىندا ۇزاق ۋاقىت وتىرۋ وتە قيىن, بۇل تۋرالى Air Astana قىزمەتكەرىنە بيبىگۇل احمەتقىزىن ۇشاق سالونىنا ەرتەرەك جىبەرۋ تۋرالى وتىنگەندە ايتىلعان بولاتىن.

اۋە كومپانياسىنىڭ قىزمەتكەرىنە بيبىگۇل احمەتقىزىنىڭ جاسى 95-كە جاقىنداعانى جانە ونىڭ قازاق حالقىنىڭ ماقتانىشى ەكەنى تۋرالى اقپارات ايتىلدى, سوندىقتان وعان كەيبىر ارتىقشىلىقتار قولدانىلۋى مۇمكىن ەدى. وسىدان كەيىن بيبىگۇل احمەتقىزى قىزمەتكەرگە ءوزىنىڭ استانا قالاسىنىڭ قۇرمەتتى ازاماتى ەكەنىن جانە وعان قانشا قاتال ەرەجە بولسا دا, ەرەكشە جاعداي جاساۋعا لايىق ەكەنىن ايتتى. كومپانيا قىزمەتكەرى بۇنىڭ بارىنەن حاباردار ەكەنىن, بىراق ەرەجەلەرگە قاراماستان, مارتەبەسىنە, جاسىنا نەمەسە جاعدايىنا قاراماستان, بارىنە بىردەي قولدانىلاتىنىن ايتتى. بارلىعىن وتە قاتتى جانە دورەكى تۇردە جەتكىزدى.

قارتتاردى, اسىرەسە ەلىمىزدى حالىقارالىق ارەنادا تانىتقان تۇلعالاردى قۇرمەتتەۋدى قىزمەتكەرلەرگە نەگە ۇيرەتپەگەنىن بىلگىمىز كەلەدى? نەگىزگى قۇرمەت-ادەپ قايدا? نەلىكتەن وسىنداي ادامدارعا كليەنتتەرمەن جۇمىس ىستەۋگە رۇقسات ەتەدى? ۇلتتىق تاسىمالداۋشى كومپانيا قىزمەتكەرلەرىنىڭ مۇنداي مىنەز-قۇلقى ماسقارا ەكەنى انىق. Air Astana, بارشامىزدىڭ سۇيىكتى تۇلعامىز بيبىگۇل احمەتقىزى تولەگەنوۆاعا قاتىستى سىزدەردىڭ تۇسىنىكتەمەلەرىڭىز بەن كەشىرىمدەرىڭىزدى كۇتەمىز!», – دەپ ۇندەۋ جاسادى.

ال اۋە كومپانيا بۇل جاعدايدى قاۋىپسىزدىك ءۇشىن بولعانىن ايتادى.

ء«بىز بيبىگۇل احمەتقىزى تولەگەنوۆا حانىمعا ءوز قۇرمەتىمىزدى بىلدىرگىمىز كەلەدى جانە كەلەسىنى تۇسىندىرگىمىز كەلەدى: Air Astana ءۇشىن قاۋىپسىزدىك باستى باسىمدىق بولىپ تابىلادى. حالىقارالىق اۆياتسيالىق قاۋىپسىزدىك ەرەجەلەرىنە سايكەس, مۇگەدەك جولاۋشىلاردى ۇشاققا وتىرعىزۋ پروتسەسىنىڭ باسىندا نەمەسە سوڭىندا شاقىرادى. بۇل ەرەجە بارلىق جولاۋشىلارعا ىڭعايلى جاعداي جاساۋ ءۇشىن جانە تەرمينالداعى ەۆاكۋاتسيا ەرەجەلەرىنە سايكەس كەلەدى. ءبىزدىڭ اقپارات بويىنشا, قازاقستاننىڭ حالىق ءارتىسى بيبىگۇل تولەگەنوۆا حانىم جانە ونىڭ قامقورشىسى ۇشاققا وتىرعىزۋ پروتسەسى باستالعان سوڭ كەلگەن, سوندىقتان اۋە كومپانياسىنىڭ اگەنتى ولاردى وتىرعىزۋ ۋاقىتى اياقتالعانشا كۇتۋىن سۇراعان. اۋە كومپانياسى تۋىنداعان تۇسىنىسپەۋشىلىك ءۇشىن وكىنەدى جانە قىزمەت ساپاسىن جاقسارتۋ ماقساتىندا قوسىمشا تەكسەرۋ جۇرگىزەدى», – دەپ جاۋاپ بەردى كومپانيادان.

جەلى قولدانۋشىلارى ۇلتتىق كومپانيانىڭ قىزمەتكەرلەرى تاراپىنان بولعان وزگە دە جاعدايلار تۋرالى جازىپ, جازالاۋ كەرەگىن ايتقان.

«ماسقارا بولعان ەكەن! تاپ وسىنداي كەلەڭسىز جاعادايلار Flyarystan كومپانياسىندا دا وتە كوپ كەزدەسەدى. ۇشۋىنا 40 مين ۋاقىتى بار سامولەتكە رەگيستراتسياعا 2 مين كەشىكتىڭىز دەپ جۇكتى ايەل مەن كىشكەنتاي بالاسىن دالادا شىرىلداتىپ قالدىرىپ كەتكەن. وسى جاعدايدى كوز الدىمىزدا كورىپ شىداي الماي جاۋاپ ىزدەپ ەدىك… ءالى جوق», «ۇياتتان بەزگەن, دىم كورمەگەن قىز. تولەگەنوۆانى تانىماۋ, ءتىپتى قارت ادامعا ولاي قارىم-قاتىناس جاساۋ ەشقانداي لوگيكاعا سىيمايدى. قاتاڭ سوگىسپەن جۇمىستان شىعارىلۋى كەرەك», – دەپ جازعان جەلى قولدانۋشىلارى.

ماتەريالدى قولدانعان جاعدايدا, باستاپقى 1 نەمەسە 2-سويلەمدە malim.kz سايتىنا گيپەرسىلتەمە بەرۋىڭىزدى سۇرايمىز. اۆتورلىق قۇقىقتى قۇرمەتتەگەنىڭىزگە العىس ايتامىز.