حالىق پەن كاسىپكەرلەردەن سىيلىق المايمىن, مەملەكەتتىڭ بەرگەنى جەتەدى – وزبەك سپورتشىسى

فوتو: Olympic.uz

بوكستان وليمپيادا ويىندارىنىڭ ەكى دۇركىن چەمپيونى وزبەكستاندىق باحودير جالولوۆ جۋرناليست نۇرسەيىت جىلقىشىبايعا بەرگەن سۇحباتىندا پاريجدەن كەيىنگى سىي-سىياپاتى تۋرالى ايتقان, – دەپ حابارلايدى qandastar.kz  1bol.kz سايتىنا سىلتەمە جاساپ.

داڭقتى بوكسشى مەملەكەتتىڭ بەرگەنىن قاناعات تۇتاتىنىن جەتكىزگەن. ال, حالىق پەن كاسىپكەرلەردەن سىي-سىياپات الۋدى ءجون كورمەيدى ەكەن. بۇل تۋرالى جىلقىشىباي ءوزىنىڭ Instagram-پاراقشاسىندا ايتتى.

«وليمپيادا ويىندارىنىڭ ەكى دۇركىن چەمپيونى باحودير جالولوۆتان سۇحبات الۋ بۇيىردى. سۇحبات كەزىندە مەن ودان كاسىپكەرلەر مەن حالىق قانداي سىيلىق بەرگەنىن سۇرادىم. ول «مەملەكەتتەن العانىم جەتەدى, قاراپايىم حالىقتان, كاسىپكەرلەردەن الىپ بايىپ كەتپەيمىن, ول سىيلىقتى و دۇنيەگە الىپ كەتپەيمىن, وليمپيادانى ەكى رەت جەڭسەم ەلىمنىڭ ابىرويى ءۇشىن جەڭدىم» دەپ جاۋاپ بەردى. ال, بىزدەگى جاعداي شە? اناۋ پاتەر بەردى, مىناۋ كولىك بەردى, ات مىنگىزدى دەپ جازىپ جاتىر. اينالايىن التىندارىم, سىزدەر ەل نامىسىن قورعاۋعا باردىڭىزدار ما, الدە دۇنيە جيناۋعا باردىڭىزدار ما?» – دەپ سۇراق قويدى جۋرناليست قازاقستاندىق سپورتشىلارعا.

جىلقىشىبايدىڭ جالولوۆپەن سۇحباتى ينتەرنەتكە ءالى شىققان جوق.