حالىقارالىق ىزدەۋدە بولعان: بالانى ءولتىرىپ, دەنەسىن دالاعا كومىپ كەتكەن قىلمىسكەر قامالدى

فوتو: سكرين

قازاقستاننىڭ باس پروكۋراتۋراسى كامەلەتكە تولماعان بالانى زورلادى جانە ءولتىردى دەپ ايىپتالعان ادامدى رەسەيدەن ەكستراديتسيالادى, دەپ حابارلايدى qandastar.kz

كامەلەتكە تولماعان بالانى الدىن الا ءسوز بايلاسۋ ارقىلى زورلاعانى جانە ونى ءولتىرۋدى ۇيىمداستىرعانى ءۇشىن قىلمىستىق جاۋاپتىلىققا تارتۋ ماقساتىندا رەسەي فەدەراتسياسىنان قازاقستان ازاماتى ەكستراديتسيالاندى.

«اتالعان تۇلعا 2008 جىلى پاۆلودار وبلىسى اقسۋ قالاسىنداعى پاتەرلەردىڭ بىرىندە كامەلەتكە تولماعان بالانى زورلاعان. وسىدان كەيىن كۇدىكتى زورلاۋ ءۇشىن جاۋاپتىلىقتان قورقىپ, تانىستارىمەن ءبىر توپ ادام بولىپ ارەكەت ەتىپ, كامەلەتكە تولماعان بالانى كۇشتەپ كولىككە وتىرعىزىپ, اۋىلدىق ايماققا الىپ كەتكەن. جول بويىندا سىبايلاستاردىڭ ءبىرى بۇرىن ادام ولتىرگەنى ءۇشىن سوتتالعان تۇلعا بولا تۇرا, جابىرلەنۋشىنىڭ موينىن ۇستاپ, ونى تۇنشىقتىرىپ ولتىرگەن. ادام ءولتىرۋدى جاسىرۋ ءۇشىن قاسكۇنەمدەر كامەلەتكە تولماعان بالانىڭ دەنەسىن دالاعا كومگەن», – دەلىنگەن باس پروكۋراتۋرانىڭ ءباسپاسوز حابارلاماسىندا.

كامەلەتكە تولماعان بالانى زورلاپ, ونى ءولتىرۋدى ۇيىمداستىرعان, قاشىپ ۇلگەرگەن جانە 15 جىل بويى حالىقارالىق ىزدەۋدە بولعان سوتتالۋشىنى قوسپاعاندا, ادام ولتىرۋگە قاتىسى بار تۇلعالار ءارتۇرلى جازا تۇرلەرىنە سوتتالدى.

بىلتىر  قىركۇيەكتە ول رەسەي فەدەراتسياسىنىڭ كراسنودار ولكەسىندە ۇستالىپ, كەيىن قازاقستان رەسپۋبليكاسى باس پروكۋراتۋراسىنىڭ سۇراۋى بويىنشا قازاقستانعا ەكستراديتسيالانعان.

قازىرگى ۋاقىتتا پەتروپاۆل قالاسىنىڭ تەرگەۋ يزولياتورىنا قامالدى.

وعان تاعىلعان قىلمىستاردى جاساعانى ءۇشىن ون جىلدان جيىرما جىلعا دەيىنگى مەرزىمگە باس بوستاندىعىنان ايىرۋ نەمەسە ءومىر بويىنا باس بوستاندىعىنان ايىرۋ تۇرىندەگى جازا قاراستىرىلعان.