جاڭالىقتار
حالىقتىڭ ارزان تاۋار الام دەپ الاياققا الدانۋى ازايماي وتىر – دەپۋتات
ءماجىلىس دەپۋتاتى ءۇنزيلا شاپاق حالىقتىڭ شەكتەن تىس كرەديت الۋىن تومەندەتۋ باعىتىنداعى زاڭنامالىق وزگەرىستەر تۋرالى ايتتى.
«قىلمىس سانىنا حالىقتىڭ قارجىلىق جانە قۇقىقتىق ساۋاتىنىڭ تومەندىگى ايتارلىقتاي اسەر ەتەدى. ازاماتتار كوبىنەسە ولاردى جاساۋ تاسىلدەرى مەن قاۋىپسىزدىك شارالارى تۋرالى بىلمەيدى, ناتيجەسىندە الاياقتاردىڭ قۋلىقتارىنا تۇسەدى. قازىر مۇنداي قىلمىستاردىڭ كوپشىلىگى جالعان سايتتار, مەسسەندجەرلەر جانە الەۋمەتتىك جەلىلەر ارقىلى جاسالادى. تۇرعىندار الاياقتاردىڭ ارزان تاۋارلار, تەز بايىتۋ تۋرالى ايلا-امالدارىنا تاپ بولادى جانە كۇدىكتى وپەراتسيالار تۋرالى حابارلاعان جالعان بانك قىزمەتكەرلەرىنە سەنەدى. ناتيجەسىندە ولار ۇلكەن سومادان ايىرىلادى, تەك بىلتىر عانا وسىنداي تاسىلدەرمەن 21 ملرد تەڭگە ۇرلانعان. بۇل قاراجات — ازاماتتاردىڭ بانكتىك جيناعى جانە وعان رەسىمدەلگەن كرەديتتەردىڭ سوماسى», — دەدى ءۇنزيلا شاپاق پارلامەنت ماجىلىسىندەگى «كيبەرقىلمىسقا قارسى كۇرەسۋدىڭ وزەكتى ماسەلەلەرى» تاقىرىبىنا ارنالعان تالقىلاۋدا.
ونىڭ ايتۋىنشا, قولدانىستاعى قىلمىستىق كودەكستە تولىققاندى ينستيتۋت, ياعني اقپاراتتاندىرۋ جانە بايلانىس سالاسىنداعى قىلمىستىق قۇقىق بۇزۋشىلىقتار تاراۋى ەنگىزىلگەن. بانكتەر بيومەتريالىق سايكەستەندىرۋ ارقىلى ونلاين-قارىز بەرۋ ءراسىمىن قاتاڭداتتى.
«مەملەكەت باسشىسىنىڭ تاپسىرماسى اياسىندا دەپۋتاتتاردىڭ باستاماسىمەن حالىقتىڭ شەكتەن تىس كرەديت الۋىن تومەندەتۋ ماسەلەلەرى بويىنشا زاڭنامالىق شارالار پىسىقتالىپ جاتىر. زاڭ جوباسىندا ازاماتتاردىڭ نەسيە الۋدان ەرىكتى تۇردە باس تارتۋ ينستيتۋتى ەنگىزىلمەك. قارىز تۋرالى اقپارات دەرەۋ كرەديتتىك بيۋروعا تاپسىرىلادى, بۇل ازاماتتاردى قاتارىنان بىرنەشە كرەديت رەسىمدەۋدەن قورعاۋعا مۇمكىندىك بەرەدى», — دەدى دەپۋتات.
سونىمەن قاتار ول تيىستى كەشەندى شارالار ازىرلەنگەنىن ايتتى.
«قاۋىپسىز قارجى ينفراقۇرىلىمىن قامتاماسىز ەتۋ ءۇشىن مەملەكەتتىك باقىلاۋ مەن قاداعالاۋدى كۇشەيتۋ, حالىق اراسىندا كەڭ اقپاراتتىق ءتۇسىندىرۋدى ۇيىمداستىرۋ, حالىققا كرەديت بەرۋ ماسەلەلەرى بويىنشا قارجى مەكەمەلەرىنە قويىلاتىن تالاپتاردى قاتاڭداتۋ ەسكەرىلگەن. زاڭ جوباسى اياسىندا پىسىقتالاتىن نورمالار ونلاين-الاياقتىق جاساۋعا بايلانىستى تاۋەكەلدەردى تومەندەتەتىنى ءسوزسىز. نەگىزىنەن بۇل — نەسيە سالاسىنداعى الاياقتىقتى بولدىرماۋعا باعىتتالعان الدىن الۋ شارالارى», — دەدى ءۇنزيلا شاپاق.
