Jańalyqtar
Halyqtyń arzan taýar alam dep alaıaqqa aldanýy azaımaı otyr – depýtat
Májilis depýtaty Únzıla Shapaq halyqtyń shekten tys kredıt alýyn tómendetý baǵytyndaǵy zańnamalyq ózgerister týraly aıtty.
«Qylmys sanyna halyqtyń qarjylyq jáne quqyqtyq saýatynyń tómendigi aıtarlyqtaı áser etedi. Azamattar kóbinese olardy jasaý tásilderi men qaýipsizdik sharalary týraly bilmeıdi, nátıjesinde alaıaqtardyń qýlyqtaryna túsedi. Qazir mundaı qylmystardyń kópshiligi jalǵan saıttar, messendjerler jáne áleýmettik jeliler arqyly jasalady. Turǵyndar alaıaqtardyń arzan taýarlar, tez baıytý týraly aıla-amaldaryna tap bolady jáne kúdikti operaııalar týraly habarlaǵan jalǵan bank qyzmetkerlerine senedi. Nátıjesinde olar úlken somadan aıyrylady, tek byltyr ǵana osyndaı tásildermen 21 mlrd teńge urlanǵan. Bul qarajat — azamattardyń banktik jınaǵy jáne oǵan resimdelgen kredıtterdiń somasy», — dedi Únzıla Shapaq Parlament Májilisindegi «Kıberqylmysqa qarsy kúresýdiń ózekti máseleleri» taqyrybyna arnalǵan talqylaýda.
Onyń aıtýynsha, qoldanystaǵy Qylmystyq kodekste tolyqqandy ınstıtýt, ıaǵnı aqparattandyrý jáne baılanys salasyndaǵy qylmystyq quqyq buzýshylyqtar taraýy engizilgen. Bankter bıometrııalyq sáıkestendirý arqyly onlaın-qaryz berý rásimin qatańdatty.
«Memleket basshysynyń tapsyrmasy aıasynda depýtattardyń bastamasymen halyqtyń shekten tys kredıt alýyn tómendetý máseleleri boıynsha zańnamalyq sharalar pysyqtalyp jatyr. Zań jobasynda azamattardyń nesıe alýdan erikti túrde bas tartý ınstıtýty engizilmek. Qaryz týraly aqparat dereý kredıttik bıýroǵa tapsyrylady, bul azamattardy qatarynan birneshe kredıt resimdeýden qorǵaýǵa múmkindik beredi», — dedi depýtat.
Sonymen qatar ol tıisti keshendi sharalar ázirlengenin aıtty.
«Qaýipsiz qarjy ınfraqurylymyn qamtamasyz etý úshin memlekettik baqylaý men qadaǵalaýdy kúsheıtý, halyq arasynda keń aqparattyq túsindirýdi uıymdastyrý, halyqqa kredıt berý máseleleri boıynsha qarjy mekemelerine qoıylatyn talaptardy qatańdatý eskerilgen. Zań jobasy aıasynda pysyqtalatyn normalar onlaın-alaıaqtyq jasaýǵa baılanysty táýekelderdi tómendetetini sózsiz. Negizinen bul — nesıe salasyndaǵy alaıaqtyqty boldyrmaýǵa baǵyttalǵan aldyn alý sharalary», — dedi Únzıla Shapaq.
