«حان شاتىر» ۇلتتىق كيىممەن بايلانىستى كيكىلجىڭ ءۇشىن كەشىرىم سۇرادى

فوتو:kazpravda.kz

الەۋمەتتىك جەلىدە استاناداعى «حان شاتىرعا» قازاقتىڭ ۇلتتىق كيىمىمەن كىرۋگە بولمايتىنى تۋرالى بلوگەردىڭ بەينەجازباسى تاراعان ەدى. ويىن-ساۋىق ورتالىعى بۇل ماسەلەگە قاتىستى رەسمي جاۋاپ بەردى, دەپ حابارلايدى qandastar.kz

jasqazaq.kz جازعانداي,  ورتالىقتىڭ رەسمي جاۋابىندا: «حان شاتىر» ساۋدا ويىن-ساۋىق ورتالىعى ەشقاشان جانە ەش ۋاقىتتا قازاقتىڭ ۇلتتىق كيىمىن كيۋگە قارسى بولعان ەمەس, سەبەبى بۇل – ءبىزدىڭ ۇلتتىق قۇندىلىعىمىز. كەرىسىنشە, العاشقى كۇننەن باستاپ بۇگىنگە دەيىن ءبىز مەملەكەتتىك ۇيىمدارمەن تىعىز ىنتىماقتاستىق ورناتىپ, ۇلتتىق مۇرامىزدى, داستۇرلەرىمىزدى جانە ونەرىمىزدى ناسيحاتتاۋعا باعىتتالعان ءىس-شارالارعا بەلسەندى كورسەتىپ كەلەمىز.

وكىنىشكە قاراي, ساۋدا ورتالىعىنا كەلۋشى مەن كۇزەت فيرما قىزمەتكەرى اراسىندا تۇسىنبەستىك پەن جاعىمسىز وقيعا بولدى. وسى جاعدايعا بايلانىستى ءبىز وسى وقيعاعا تاپ بولعان كەلۋشىمەن كەزدەسىپ, ءمان-جايدى تولىق ءتۇسىندىرىپ, رەسمي تۇردە كەشىرىم سۇرادىق. «حان شاتىر» ساۋدا ويىن-ساۋىق ورتالىعىنىڭ اتىنان وسى وقيعا سالدارىنان كوڭىلىنە قاياۋ تۇسكەن قازاقستان رەسپۋبليكاسى ازاماتتارىنان شىن جۇرەكتەن كەشىرىم سۇرايمىز. تۇسىنىستىك تانىتقاندارىڭىز ءۇشىن العىسىمىزدى بىلدىرەمىز جانە وسىنداي كەلەڭسىزدىكتەر قايتالانبايدى دەپ ۇمىتتەنەمىز, — دەلىنگەن.