«حاننىڭ قىزىسىز با?». بۇرىنعى اكىمگە تىكەلەي ساۋال قويعانى ءۇشىن قىسىمعا ۇشىراعان بەلسەندىنىڭ بالالارى توقاەۆقا ۇندەۋ جولدادى

فوتو: ۆيدەودان سكرينشوت

ء«بىزدى اناسىز قالدىرماۋىڭىزدى سۇرايمىز». بەلسەندى ساندۋعاش تۇرلىبەكوۆانىڭ بالالارى قاسىم-جومارت توقاەۆقا ۇندەۋ جولداپ, بازىناسىن ايتتى, دەپ حابارلايدى  qandastar.kz Alash.kz ۇلتتىق پورتالىنا سىلتەمە جاساپ.

قۇرمەتتى قازاق ەلى, قۇرمەتتى قاسىم-جومارت توقاەۆ مىرزا, قۇرمەتتى قىزىلوردا وبلىسىنىڭ اكىمى, جاڭاقورعان اۋداندىق سوتى. سىزدەردەن انامىز ساندۋعاش تۇرلىبەكوۆانىڭ سوتىنا بايلانىستى ادىلدىك سۇرايمىز. سوتتىڭ ءادىل بولۋىن, ءبىزدىڭ بەس بالانى اناسىز قالدىرماۋلارىڭىزدى ءوتىنىپ سۇرايمىز. انامىزعا جابىلعان جالادان اقتالىپ شىعۋعا ىقپال ەتىپ, ادىلدىك ورناتساڭىزدار ەكەن دەيمىز, – دەدى ولار.

ەسكە سالا كەتەيىك, ساندۋعاش تۇرلىبەكوۆا 2020 جىلدىڭ 16 شىلدەسىندە جاڭاقورعان كەنتىنىڭ اۋرۋحانالارىن ارالاپ جۇرگەن قىزىلوردا وبلىسىنىڭ بۇرىنعى اكىمى گۇلشارا ابدىحالىقوۆانىڭ الدىنان شىعىپ, «حاننىڭ قىزىسىز با?» دەپ توتەسىنەن ساۋال قويىپ, جول جابىلۋدىڭ سەبەبىن سۇراپ, تۇسىرگەن ۆيدەوسىن الەۋمەتتىك جەلىدە جاريالانعان ەدى.

ۆيدەودا تۇرلىبەكوۆا ءمىنىپ كەلە جاتقان ميكرواۆتوبۋستى جول پوليتسياسى «اكىم جۇرەدى» دەپ جىبەرمەي تۇرعانى كورىنەدى. ء«ارى قاراي جاياۋ كەتۋگە ءماجبۇر بولدىم» دەگەن تۇرلىبەكوۆا اۋرۋحانا الدىنان وبلىس اكىمىن كورىپ, «جولدى جاپقىزاتىنداي حاننىڭ قىزى ما ەدىڭىز?» دەپ ساۋال قويادى. بەلسەندىگە جۇرە جاۋاپ بەرگەن ابدىحالىقوۆا كەيىن ارنايى ۆيدەو تاراتىپ, ءوزىنىڭ دە, اۋدان اكىمىنىڭ دە, اۋداندىق ىشكى ىستەر ءبولىمىنىڭ دە جولدى جاپقىزباعانىن ايتىپ, ۋچاسكەلىك پوليتسياعا كىنا ارتقان.

وبلىس اكىمى مەن قوعام بەلسەندىسىنىڭ ديالوگى الەۋمەتتىك جەلىدە كەڭ تاراپ, ءتۇرلى پىكىر تۋعىزدى. تۇرلىبەكوۆا وسىدان كەيىن اۋدان اكىمدىگى مەن اۋدان پروكۋراتۋراسى شاقىرىپ, قىسىم جاساۋعا تىرىسىپ جاتقانىن الەۋمەتتىك جەلىدە حابارلاپ ءجۇردى.