«Hannyń qyzysyz ba?». Burynǵy ákimge tikeleı saýal qoıǵany úshin qysymǵa ushyraǵan belsendiniń balalary Toqaevqa úndeý joldady

Foto: vıdeodan skrınshot

«Bizdi anasyz qaldyrmaýyńyzdy suraımyz». Belsendi Sandýǵash Turlybekovanyń balalary Qasym-Jomart Toqaevqa úndeý joldap, bazynasyn aıtty, dep habarlaıdy  qandastar.kz Alash.kz ulttyq portalyna silteme jasap.

Qurmetti Qazaq eli, Qurmetti Qasym-Jomart Toqaev myrza, Qurmetti Qyzylorda oblysynyń ákimi, Jańaqorǵan aýdandyq soty. Sizderden anamyz Sandýǵash Turlybekovanyń sotyna baılanysty ádildik suraımyz. Sottyń ádil bolýyn, bizdiń bes balany anasyz qaldyrmaýlaryńyzdy ótinip suraımyz. Anamyzǵa jabylǵan jaladan aqtalyp shyǵýǵa yqpal etip, ádildik ornatsańyzdar eken deımiz, – dedi olar.

Eske sala keteıik, Sandýǵash Turlybekova 2020 jyldyń 16 shildesinde Jańaqorǵan kentiniń aýrýhanalaryn aralap júrgen Qyzylorda oblysynyń burynǵy ákimi Gúlshara Ábdihalyqovanyń aldynan shyǵyp, «Hannyń qyzysyz ba?» dep tótesinen saýal qoıyp, jol jabylýdyń sebebin surap, túsirgen vıdeosyn áleýmettik jelide jarııalanǵan edi.

Vıdeoda Turlybekova minip kele jatqan mıkroavtobýsty jol polıııasy «ákim júredi» dep jibermeı turǵany kórinedi. «Ári qaraı jaıaý ketýge májbúr boldym» degen Turlybekova aýrýhana aldynan oblys ákimin kórip, «joldy japqyzatyndaı hannyń qyzy ma edińiz?» dep saýal qoıady. Belsendige júre jaýap bergen Ábdihalyqova keıin arnaıy vıdeo taratyp, óziniń de, aýdan ákiminiń de, aýdandyq ishki ister bóliminiń de joldy japqyzbaǵanyn aıtyp, ýchaskelik polıııaǵa kiná artqan.

Oblys ákimi men qoǵam belsendisiniń dıalogy áleýmettik jelide keń tarap, túrli pikir týǵyzdy. Turlybekova osydan keıin aýdan ákimdigi men aýdan prokýratýrasy shaqyryp, qysym jasaýǵa tyrysyp jatqanyn áleýmettik jelide habarlap júrdi.