مادەنيەت
«حوچەش, ۋحودي نا ح*ر…»: ۇلتتىق ارنا پروديۋسەرى تانىمال ءانشىنى جوبادان «قۋىپ جىبەرگەن»
فوتو: اشىق دەرەككوز
تانىمال ءانشى اقبوتا كەرىمبەكوۆا Qazaqstan ۇلتتىق ارناسىنىڭ «جۇلدىزدى جۇپ» جوباسىنىڭ پروديۋسەرى دينارا ادامنان قورلاۋ ءسوز ەستىگەنىن ايتىپ, «قازاقستان» تەلەراديو كورپوراتسياسىنىڭ باسقارما ءتورايىمى ءلاززات تانىسبايعا ۇندەۋ جولدادى, دەپ حابارلايدى qandastar.kz Ulysmedia.kz-كە سىلتەمە جاساپ.
ءانشىنىڭ ۇندەۋ جاساۋىنا «جۇلدىزدى جۇپ» اتتى جاڭا جوبانىڭ دۇرىس ۇيىمداستىرىلماۋى جانە وتاندىق تەلەارنالارداعى جوبانى, تەندەردى جەڭىپ الۋدىڭ ءتۇرلى جولدارى ماسەلەسى سەبەپ بولعان. اقوردانى, ءتىپتى توقاەۆتى بەلگىلەگەن ءانشىنىڭ ۇندەۋ ءماتىنى تومەندەگىدەي:
«ساحنادا جۇرگەن انشىلەردى وسىلاي «پوسلات» ەتە بەرسە…»
ۇندەۋ
ءلاززات تانىسبايعا جانە تەكسەرۋشى ورگاندارعا
جاعداي بىلاي! بۇگىن «قازاقستان» ۇلتتىق ارناسىنىڭ «جۇلدىزدى جۇپ» جوباسىنىڭ كەزەكتى تۇسىرىلىمىنە الماتىدان استاناعا ۇشىپ كەلدىك. ءبىراز بۇرىن باعدارلامانى ۇيىمداستىرۋشىلار ماعان حابارلاسىپ, SAAD مەيمانحاناسىنا بولمە بروندالعان, سول جاققا ورنالاسساڭىز» دەدى. ايتقاندارىن جاساپ, سوندا بارسام, «سىزگە ورىن بروندالماعان» دەيدى. بىردەن جاۋاپتى قىزدارعا حابارلاسىپ, ءمان-جايدى ءتۇسىندىرىپ, ءوزىمنىڭ قاتتى اۋىرىپ كەلگەنىمدى, ماسەلەنى تەزىرەك شەشۋىن سۇرادىم.
«باسقا جەرگە اۋىسساڭىز» دەدى. كوشىپ-قونىپ جۇرۋگە شامامنىڭ بولماي تۇرعانىن ايتىپ, ءسال نازىمدى جەتكىزدىم. ءبىر كەزدە اتى-ءجونى جوق, جوبا پروديۋسەرى, «ايگىلى» دينارا ادام حابارلاسىپ, جەكىپ, «يا ۋستالا ۋجە وت ۆسەح ەتيح كاپريزوۆ, ۆسە ۆاشي كاپريزى ۋ مەنيا ۆىشە گولوۆا ستويات. حوچەش, ۋحودي نا ح*ر يز ەتوگو پروەكتا», — دەيدى.
ءدال وسىلاي! قازاقتا «قارنىمنىڭ اشقانىنا ەمەس, قادىرىمنىڭ قاشقانىنا ناليمىن» دەگەن ءسوز بار. ۇلت ۇلت بولعالى ماڭدايىمىزعا بۇيىرعان جالعىز ۇلتتىق ارنامىزدىڭ ماڭدايالدى جوبالارىنا الاش تۇگىلى, ادامنىڭ قادىرىن بىلمەيتىن, بىردە-ءبىر رەت قازاقشا ويلانىپ, وي قورىتىپ كورمەگەن بىرەۋلەر جەتەكشىلىك ەتكەسىن, كورگەن كۇن وسى ەكەن…
قازىر قوعامدا ءتول ارنالارىمىزدىڭ وسى تەكتەس مۋزىكالىق جوبالارىنا سىن كوپ. «تۇرقى جوق ءانشى, سۇرقى جوق ءسوز, ۇلتى جوق ءان قاپتادى» دەپ وكپەلەيدى حالىق. 30 جىلعا جۋىق قازاقتىڭ عانا ءانىن ايتىپ, ساحنادا جۇرگەن انشىلەردى وسىلاي «پوسلات» ەتە بەرسە, ءان ونەرىنە قىزمەت ەتۋگە كىمدە ق ۇلىق بولادى دەيسىز? – دەدى اشىنعان ءانشى.
«تەلەارنا تەندەرىن ۇتىپ الۋدىڭ جولدارى قانداي?»
وسى ورايدا اقبوتا كەرىمبەكوۆا وسىنداي اقشالى جوبالاردى تەك وسى دينارا ادام ۇتىپ الاتىنىن, بۇل كۇمان تۋدىرماي ما دەگەن ساۋالىن ورتاعا تاستادى.
جەكە وزىمە بۇل جوبا تۇك تە قىزىق ەمەس, تەك, «مەن بولماسام, كىم? ءوز اۆتورلارىمنىڭ تۋىندىلارى حالىققا جەتە بەرسىن. جاسىمدى, جولىمدى پۇلداپ مەن قاتىسپاسام, مەنىڭ ورنىما ءشوپتى دە, شوڭگەنى دە ولەڭ عىپ جۇرگەن بىرەۋ تابىلادى عوي» دەگەن ويمەن شاقىرۋلارىنا كەلىسىم بەرگەم. بۇعان دەيىن بۇل جوبادان, بۇل پروديۋسسەرلىك قۇرامنان ءبىر تيىن گونورار دا الىپ كورمەگەم.
وزگە ەلدەن كەلەتىن «ايدىك» انشىلەردەي رايدەر دە قويمايمىز. قاراپايىم كۇتىپ الۋ ادەبىن ساقتاسا, مەنىڭ بۇلاردا نەم بار? سونىسىمەن قويماي, اناداي ءسوز ايتادى!.. بۇل كىم سوندا?! سوسىن, بايقايمىن, وسىنداي اقشالى جوبالاردى تەك وسى دينارا ادام ۇتىپ الادى. بۇعان دەيىن نە ۇلتتىق ارناعا, نە ۇلتقا بەرەرى بار جوباسى بولماسا دا!.. بۇل كۇمان تۋدىرماي ما? جالپى, تەلەارنا جاريالايتىن تەندەردى ۇتىپ الۋدىڭ رەسمي, بەيرەسمي جولدارى قانداي? بۇل جوباعا قانشا ءبولىندى, ودان قاتىسۋشىلارعا قالاماقى, دۇرىس جاتىن ورىن قارالماسا, وندا, مەملەكەت قارجىسى قايدا كەتىپ جاتىر? – دەدى ول.
«ءوز ۇندەۋىمدى ءلاززات تانىسبايعا تىكەلەي جولداعىم كەلەدى»
قازاقى انشىلەردى «مامبەت» سانايتىن, قازاق رۋحانياتىنا قوسقان تيتىمدەي ۇلەسى جوق دينارا ادامعا بار جوبانى ۇتىپ الا بەرەتىن كۇش قايدان, قالاي بىتكەن, وسىعان دەيىنگى اتقارعان جۇمىستارىنىڭ ەسەبى قانداي دەگەن ساۋالدار دا مەنى ويلاندىرا باستادى. سوسىن, ەڭ ۇلى رەجيسسەرلەردى دايىندايتىن كەلندەگى ۋنيۆەرسيتەتتە پروفەسسور بولعان بولات اتاباەۆتىڭ تۋعان جەرىندە ۇلتتىق ارنانىڭ ءبىر مۋزىكالىق جوباسىن جاساي الاتىن رەجيسسەر جوقتاي, وسى دينارانىڭ شەشىمىمەن رەسەيدەن, ۋكراينادان, ت.ب. شەت ەلدەن رەجيسسەرلەردىڭ كەلىپ, حالىقتىڭ بالەنباي اقشاسىن قالتاسىنا باسىپ, ءبىزدىڭ ونەرگە جاساپ جۇرگەن «قىزمەتىن» قاي دەڭگەيدە باعالاۋعا بولادى دەگەن سۇراق تا مەنىڭ كوكەيىمدە تۇر. «سپورتىمىزدى لەگيونەرلەر قۇلدىراتتى» دەپ زار قاقساپ جاتىرمىز, ال تەلەديدارىمىزدى شە?.. وسى رەتتە, مەن, كوپ ءارتىستىڭ «اۋزىنىڭ ۇشىندا» جۇرگەن ساۋالدى, وسى ءوز ۇندەۋىمدى ۇلتتىق ارنانىڭ باسقارما ءتورايىمى ءلاززات تانىسبايعا تىكەلەي جولداعىم كەلەدى. قارجىلىق بولىنىستەر مەن ونىڭ ورىندى, ءتيىمدى جۇمسالۋى بويىنشا تەكسەرۋشى ورگاندارعا دا وسى ءۇنىم جەتسە دەيمىن! قۇرمەتپەن, اقبوتا كەرىمبەكوۆا, — دەپ جازدى ءانشى.
