حرومتاۋدا كولىك ىشىندە 10 جاسار قىز كوز جۇمدى: وقيعاعا قاتىستى جاڭا دەرەك شىقتى

فوتو: Halyq Uni/داۋرەن ەربولات

اقتوبە وبلىسى حرومتاۋ اۋدانى ءدون اۋىلىندا كولىك ىشىندە ورتەنىپ كەتكەن 10 جاستاعى قىزدىڭ وقيعاسىنا قاتىستى تىڭ دەرەك شىقتى, دەپ حابارلايدى Halyq Uni Sputnik قازاقستان-عا سىلتەمە جاساپ.

كولىكتىڭ ورتەنگەنى تۋرالى 101 نومەرىنە 13 ساعات 46 مينۋتتا حابارلاما تۇسكەن.

ءورت ورنىنا 13 ساعات 47 مينۋتتا حرومتاۋ اۋدانىنىڭ №20 ءورت ءسوندىرۋ بولىمىنەن 6 ادام جانە حرومتاۋ اۋدانىنىڭ توتەنشە جاعدايلار ءبولىمىنىڭ 2 قىزمەتكەرى اتتاندى. ءورت بولعان اۋىل اۋدان ورتالىعىنان 6 شاقىرىم جەردە. ءورت سوندىرۋشىلەر 10 مينۋتتا جەتتى, – دەيدى حرومتاۋ اۋداندىق توتەنشە جاعدايلار ءبولىمى.

جالىن 20 مينۋتتا تولىق سوندىرىلگەن.
«ءورت ءسوندىرۋ بارىسىندا اۆتوكولىكتىڭ ىشىنەن ءجاسوسپىرىمنىڭ جانسىز دەنەسى انىقتالدى», – دەيدى ۆەدومستۆوداعىلار.

جەتكىنشەك قىز ۇيدەگى ءۇش بالانىڭ كەنجەسى.

كۇندەلىكتى كولىككە كىرىپ-شىعىپ ويناپ جۇرگەن بالا.

كولىكتىڭ اقاۋى بولماعان, كۇندەلىكتى ءمىنىپ جۇرگەن كولىك. اتا-اناسى ۇيگە كىرىپ كەتكەن. كولىكتىڭ ەسىگى ىشتەن دە, سىرتتان دا وڭاي اشىلادى. كولىك ورتەنگەندە بالانىڭ ىشىندە بولعانىن ەشكىم بىلمەگەن, – دەيدى ءدون اۋىلىنىڭ اكىمدىگى.

بالانىڭ كولىكتەن نە ءۇشىن شىعا الماي قالعانى قۇتقارۋشىلاردى دا تاڭقالدىرعان. ويتكەنى كولىك قۇلپى جابىلىپ قالاتىنداي ەمەس, دەيدى ولار.