حۋتورلىق حاسان قاسىمباەۆتىڭ ايەلى ۇندەۋ جاساپ, ونىڭ نەمەن اينالىساتىنىن ايتتى

تالعاردا اجال قۇشقان شەرزات بولاتتىڭ ولىمىنە قاتىستى ىستەن كەيىن ەسىمى باق بەتتەرى مەن الەۋمەتتىك جەلىدە كوپ اتالعان حاسان قاسىمباەۆتىڭ ايەلى ۇندەۋ جاسادى, – دەپ حابارلايدى qandastar.kz Dalanews.kz-كە سىلتەمە جاساپ.

قاسىمباەۆتىڭ ايەلىنىڭ سوزىنشە, جۇبايى كىناسىز, ول – ەشكىمگە زيان تيگىزبەگەن ادام.

«ول مال شارۋاشىلىعىمەن اينالىسادى. كىشىگىرىم بەتون شىعاراتىن زاۋىتى بار. كۇيەۋىم تۋرالى ايتىلىپ جاتقان اقپارات جالعان. بىرەۋ ايتتى, قالعاندارى سونى قولداپ وتىر. ونى شىنىمەن تانيتىن ادامدارعا بارىڭىزدار, «قانداي ادام?» دەپ سۇراڭىزدار! بىرگە تۇرىپ جاتقانىمىزعا 15 جىل بولدى. ءۇش بالامىز بار. ويلاڭىزشى, بالالارىمىزعا قانداي پسيحولوگيالىق سوققى ءتيىپ جاتىر?» – دەدى ول.

ايتا كەتەيىك, كەشە «حۋتورلىق» حاسان ۇستالعانى بەلگىلى بولدى.

كەيىن پوليتسيا مالىمدەمە جاساپ, حاسان قاسىمباەۆتىڭ ۇستالۋى – شەرزاتتىڭ ولىمىنە بايلانىستى ەمەس ەكەنىن حابارلادى.

پد مالىمەتىنشە, قاسىمباەۆ 2 قاراشادا ۇستالىپ, ۋاقىتشا ۇستاۋ يزولياتورىنا قاماۋعا الىنعان. ول ازامات ا.-نى ۇرلاپ, دەنساۋلىعىنا اۋىر زيان كەلتىردى دەگەن كۇدىككە ىلىنگەن.

وقيعا 2021 جىلدىڭ ماۋسىمىندا بولعان.

«قازىرگى ۋاقىتتا قىلمىستىڭ بارلىق ءمان-جايىن جان-جاقتى, تولىق جانە وبەكتيۆتى زەرتتەۋدى قامتاماسىز ەتۋ ءۇشىن تەرگەۋ ارەكەتتەرىنىڭ كەشەنى جۇرگىزىلىپ جاتىر. ءىس ماتەريالدارى بۇلتارتپاۋ شاراسىن سانكتسيالاۋ ءۇشىن سوتقا جىبەرىلدى», – دەدى بۇعان دەيىن الماتى وبلىستىق پد وكىلدەرى.