جاڭالىقتار
ءىىم اتا-انالارعا ەسكەرتۋ جاسادى
فوتو: اشىق دەرەككوز
2024 جىلى پوليتسەيلەر ەسىرتكىنىڭ زاڭسىز اينالىمىنا قاتىسى بار 61 كامەلەتكە تولماعان, ال جىل باسىنان بەرى التى ءجاسوسپىرىمدى ۇستادى, دەپ جازدى qandastar.kz
ەسىرتكى قىلمىسىنا قارسى ءىس-قيمىل قىزمەتكەرلەرى استانادا ەلوردالىق جوعارى وقۋ ورنىنىڭ 16 جاستاعى ەكى ستۋدەنتىن ۇستادى. ولاردىڭ بىرەۋىنەن اسا ءىرى كولەمدە سينتەتيكالىق ەسىرتكى تاركىلەندى.
بۇعان قوسا, قاراعاندى وبلىسىندا ەكى ءجاسوسپىرىم ۇستالدى. ولار 9-10-سىنىپ وقۋشىلارى. جاسوسپىرىمدەر ەسىرتكى تاراتاتىن Telegram-ارناعا سىلتەمەسى بار جاپسىرمالاردى جاپسىرۋمەن اينالىسقان.
اتالعان فاكتىلەر ءۇشىن قىلمىستىق جازا كوزدەلەدى.
پوليتسيا قىزمەتكەرلەرى ەلىمىزدىڭ بارلىق وقۋ ورىندارىندا قۇقىقتىق تۇسىندىرمە جۇمىسىن جۇرگىزەدى. سوعان قاراماستان, مۇنداي فاكتىلەر ءالى دە كەزدەسىپ جاتىر.
قۇرمەتتى اتا-انالار! بالالارىڭىزبەن ەسىرتكىنىڭ زيانى تۋرالى سويلەسىپ, زاڭسىز ارەكەت ءۇشىن جاۋاپكەرشىلىك بارىن تۇسىندىرىڭىزدەر. ولار زاڭسىز ارەكەتكە تارتىلسا, سىزدەرگە ايتۋعا قورىقپاۋى كەرەك. بالالاردىڭ ارالاسۋ ورتاسىن, ولار پايدالاتىن ينتەرنەت-رەسۋرستاردى قاداعالاڭىزدار. زاتتارىنىڭ اراسىندا مەديتسينالىق پرەپاراتتار, فولگا, شىنى تۇتىكشەلەر كەزدەسسە, نازاردان تىس قالدىرماڭىزدار. ولار ەسىرتكى قولدانۋعا ارنالعان بولۋى مۇمكىن. ەسىرتكى قىلمىستارى ءۇشىن قىلمىستىق جاۋاپكەرشىلىك 16 جاستان باستالاتىنىن ەسكە سالامىز, – دەدى ءىىم ەسىرتكى قىلمىسىنا قارسى ءىس-قيمىل كوميتەتى توراعاسىنىڭ ورىنباسارى قۋاندىق ءالجانوۆ.
