ءىىم ەل ازاماتتارىنا ەسكەرتۋ جاسادى

قر ءىىم ەل ازاماتتارىنا قارجىلاي شىعىنعا ۇشىراپ, الاياقتاردىڭ تۇزاعىنا تۇسپەس ءۇشىن مىنالاردى جادىدا ساقتاۋعا كەڭەس بەرەدى:

• فيرمانىڭ ليتسەنزياسىن جانە ول تۋرالى پىكىرلەردى تەكسەرىڭىز. مۇنداي ساپارلاردى ۇيىمداستىرۋمەن اينالىساتىن رەسمي تۋريستىك فيرمالاردىڭ مەملەكەتتىك ليتسەنزياسى بولۋى كەرەك. كليەنتتەردىڭ پىكىرلەرىن زەرتتەڭىز. تۋروپەراتورلار ءار تۋريستكە تۋركود ۇسىنۋى ءتيىس.
• تىم تومەن باعاعا قىزىعىپ, الدانىپ قالماڭىز. ەگەر ءسىزدى تومەن باعامەن قىزىقتىرسا, اسىقپاڭىز, مۇنداي ۇسىنىستار كوبىنەسە الاياقتىقپەن بايلانىستى بولۋى مۇمكىن. ءتۇرلى تۋرفيرمالاردىڭ باعالارىن سالىستىرىپ, ولاردىڭ نارىقتىق باعاعا سايكەستىگىن انىقتاپ العانىڭىز ءجون.
• قۇجاتتار مەن كەلىسىمشارتتى تەكسەرىڭىز. بارلىق كەلىسىمشارتتاردى مۇقيات وقىپ شىعىڭىز. ءاربىر تارماققا ءجىتى نازار اۋدارىڭىز, بۇل كەلەڭسىز جاعدايلاردىڭ الدىن الۋعا كومەكتەسەدى. ەگەر سىزگە ءبىر نارسە تۇسىنىكسىز بولسا, مامانمەن كەڭەسۋدى ۇمىتپاڭىز.
• بايلانىس دەرەكتەرىنە نازار اۋدارىڭىز. سەنىمدى تۋرفيرمانىڭ ارقاشان بايلانىس تەلەفونى, ەلەكتروندى پوشتاسى جانە ناقتى مەكەنجايى بولادى. الاياقتار كوبىنەسە بايلانىس دەرەكتەرىن كورسەتپەي, ۆيرتۋالدى پاراقشالاردىڭ ارتىندا جاسىرىنۋى مۇمكىن.
• تۋر باعدارلاماسىن مۇقيات زەردەلەڭىز. تۋردىڭ قۇنىنا نە كىرەتىنىن انىقتاڭىز (ۇشۋ, تۇرعىن ءۇي, كولىك, تاماقتانۋ, مەديتسينالىق ساقتاندىرۋ جانە باسقا قىزمەتتەر). بارلىق قاجەتتى شىعىنداردىڭ ەسكەرىلگەنىنە جانە كەزدەيسوق تولەمدەردىڭ بولمايتىنىنا كوز جەتكىزىڭىز.