ءىىم فارماتسەۆتەرگە ماڭىزدى ەسكەرتۋ جاسادى

فوتو: اشىق دەرەككوز

ىشكى ىستەر مينيسترلىگىنىڭ وكىلدەرى «ترامادولدى» دارىگەردىڭ رەتسەپتىنسىز ساتقانى ءۇشىن قىلمىستىق جاۋاپكەرشىلىك بارىن ەسكە سالادى, – دەپ حابارلايدى qandastar.kz ىىم ءباسپاسوز قىزمەتىنە سىلتەمە جاساپ.

2023 جىلى «ترامادول» پسيحوتروپتى زاتى ەسىرتكى تىزىمىنە ەنگىزىلگەن. ەسىرتكى قاتارىنا ەنگىزىلگەنگە دەيىن «ترامادول» ەل بويىنشا سەگىز مىڭعا جۋىق ءدارىحانادا ساتىلعان. قازىر ول دارىگەردىڭ رەتسەپتى بويىنشا ءتيىستى ليتسەنزياسى بار ءدارىحانالاردا عانا ساتىلادى.

– جىل باسىنان بەرى «ترامادولدى» زاڭسىز ساقتاعانى ءۇشىن ءۇش ادام قاماۋعا الىندى. ولاردان 2500-دەن اسا تابلەتكا تاركىلەندى. وسىعان بايلانىستى ءدارىحانالار مەن فارماتسەۆتيكالىق كومپانيالاردىڭ باسشىلارىنا قولدانىستاعى زاڭناما تالاپتارىن قاتاڭ ساقتاۋ قاجەت ەكەنىن ەسكە سالامىز. مەديتسينادا قولدانىلاتىن پسيحوتروپ زاتتار مەن ەسىرتكىلەردى رەتسەپتسىز ساتۋ قىلمىستىق كودەكستىڭ 297-بابى 3-بولىگىمەن قارالىپ, ەسىرتكىنى زاڭسىز وتكىزۋ بولىپ سانالاتىنىن ەسكەرتەمىز, – دەدى ءىىم ەسىرتكى قىلمىسىنا قارسى ءىس-قيمىل كوميتەتى باسقارماسى باستىعىنىڭ ورىنباسارى ايبەك برىكوۆ.

ايتا كەتەيىك, بۇل ءۇشىن 10 جىلدان 15 جىلعا دەيىن باس بوستاندىعىنان ايىرۋ جازاسى قاراستىرىلعان.