جاڭالىقتار
ءىىم شەتەلدە دەمالۋدى جوسپارلاپ جۇرگەن قازاقستاندىقتارعا ۇندەۋ جاسادى
پوليتسيا شەتەلگە ساپار شەگۋدى جوسپارلاپ وتىرعان قازاقستاندىقتاردى تۋريستىك اگەنتتىكتى مۇقيات تاڭداۋعا شاقىردى,-دەپ حابارلايدى Qandastar.kz
ىشكى ىستەر مينيسترلىگىنىڭ رەسمي مەديا-پورتالىنداجاريالانعان اقپارات بويىنشا, ەل تۇرعىندارى تۋريستىك فيرمالاردىڭ ارەكەتىنە شاعىمدانىپ جاتىر.
«ماۋسىمدا پوليتسيا بولىمىنە اقتوبە قالاسىنىڭ تۇرعىنى تۋريستىك اگەنتتىككە الدانعانى تۋرالى ارىزداندى. تەرگەپ-تەكسەرۋ بارىسىندا مامىردا اقتوبە قالاسىندا ورنالاسقان تۋريستىك اگەنتتىكتەردىڭ بىرىندە ونىڭ باسشىسى اۋە بيلەتتەرىن الىپ بەرەتىنىن ايتىپ الداۋ جولىمەن جابىرلەنۋشىنىڭ 250 مىڭ تەڭگەدەن استام قاراجاتىن زاڭسىز يەمدەنگەنى انىقتالدى. قازىر الاياقتىق فاكتىسى بويىنشا سوتقا دەيىنگى تەرگەۋ امالدارى جۇرگىزىلۋدە. تەرگەۋ بارىسىندا تۋريستىك فيرمانىڭ ديرەكتورى وبلىستىڭ تاعى بىرنەشە تۇرعىنىن الداعانى انىقتالدى», – دەيدى پوليتسەيلەر.
وسىعان بايلانىستى پوليتسەيلەر تۋريستىك اگەنتتىكتەردى تاڭداعاندا اسا ساق بولۋعا, الدىن الا تولەمدەر اۋدارماۋعا, جاسالعان كەلىسىمشارتتى مۇقيات وقۋعا, ولاردان بارلىق تۋريستىك قۇجاتتى تالاپ ەتۋگە جانە الدىن الا تەكسەرىپ الۋعا شاقىرادى.
