جاڭالىقتار
ءىىم ۋاقىتشا ۇستاۋ يزولياتورىنداعى ۆيدەوعا پىكىر ءبىلدىردى
ۆەدومستۆونىڭ مالىمەتىنشە, الماتى وبلىسى ەڭبەكشىقازاق اۋدانىنى ۋاقىتشا ۇستاۋ يزولياتورىنداعى جاعداي بويىنشا تەكسەرۋ جۇرگىزىلدى.
«ۆيدەونى ۋاقىتشا ۇستاۋ يزولياتورىنىڭ بۇرىنعى قىزمەتكەرى قىزمەت مۇددەلەرىنە قايشى ارەكەت جاساپ, جۇرگىزگەنى انىقتالدى. ول بۇل ءۇشىن جەكە ۇيالى تەلەفونىن پايدالانعان. قىزمەتتىك ءتارتىپتى ورەسكەل بۇزعانى ءۇشىن ول ارنايى شەنىنەن ايىرىلىپ, تەرىس سەبەپتەرمەن جۇمىستان قۋىلدى», – دەلىنگەن حابارلامادا.
سونىمەن قاتار اتالعان فاكتى بويىنشا قىلمىستىق ءىس قوزعالعانى بەلگىلى بولدى.
قىزمەتتىك ءتارتىپتى ورەسكەل بۇزعانى جانە تيىسىنشە باقىلاۋ جۇرگىزبەگەنى ءۇشىن 16 باسشى مەن قىزمەتكەر لاۋازىمنان بوساتىلدى. ونىڭ ىشىندە ۋاقىتشا ۇستاۋ يزولياتورىنىڭ باسشىسى دا قىزمەتىنەن قۋىلدى.
ء«ىىم مۇنداي بۇزۋشىلىقتارعا مۇلدەم توزبەۋشىلىك تانىتىپ, قاتاڭ توسقاۋىل قويادى. ولار بۇكىل قۇقىق قورعاۋ جۇيەسىنىڭ بەدەلىنە نۇقسان كەلتىرىپ, ازاماتتاردىڭ قاۋىپسىزدىگىن قامتاماسىز ەتىپ, كۇندەلىكتى ءوز مىندەتتەرىن ادال ورىندايتىن قىزمەتكەرلەردىڭ اتىنا داق تۇسىرەدى».ىشكى ىستەر مينيسترلىگىنىڭ ءباسپاسوز قىزمەتى
مينيسترلىكتىڭ مالىمەتىنشە, بولعان جاعدايعا بايلانىستى ۋاقىتشا ۇستاۋ يزولياتورىندا باقىلاۋ كۇشەيتىلدى: قوسىمشا بەينەمونيتورينگ شارالارى ەنگىزىلىپ, ۇقساس مەكەمەلەردە جوسپاردان تىس تەكسەرۋلەر باستالدى.
ەسكە سالايىق, بۇعان دەيىن الەۋمەتتىك جەلىدە شەرزات پولاتتى ءولتىردى دەگەن كۇدىكتىلەردىڭ ءبىرىنىڭ ۋاقىتشا ۇستاۋ يزولياتورىنداعى ۆيدەوسى تاراعان ەدى.
وندا ولار تۋعان كۇن تويلاپ, «اليسا» ارقىلى قايرات نۇرتاستىڭ «تۋعان كۇن» انىنە «تاپسىرىس» بەرىپ, ءتىپتى تورتتاعى شامدى دا ۇرلەيدى.
جەلى قولدانۋشىلارى اۋىر قىلمىس جاسادى دەپ ايىپتالعانداردىڭ ۋاقىتشا ۇستاۋ يزولياتورىندا بۇلاي ءومىر ءسۇرىپ جاتقانىنا نارازى بولدى.
الماتى وبلىسىنىڭ پوليتسياسى Zakon.kz تىلشىسىنە قىزمەتتىك تەكسەرىس باستالعانىن حابارلادى.
«ۋاقىتشا ۇستاۋ يزولياتورىندا ۇستالعانداردىڭ ءبىرىنىڭ تۋعان كۇنىن تويلاپ جاتقانى تۇسىرىلگەن ۆيدەوعا قاتىستى جان-جاقتى تەرگەۋ ءجۇرىپ جاتىر. بارلىق كىنالىلەر, ونىڭ ىشىندە باسشىلىق قاتاڭ جاۋاپكەرشىلىككە تارتىلادى. تەرگەۋ بارىسى ەرەكشە باقىلاۋدا», – دەپ حابارلادى ۆەدومستۆو سول كەزدە.
