يلحام اليەۆ قازاق حالقىنا العىسىن ءبىلدىردى

فوتو: اشىق دەرەككوز

ازەربايجان پرەزيدەنتى يلحام اليەۆ اقتاۋدا ورىن العان قايعىلى وقيعا كەزىندە زارداپ شەككەندەرگە جان-جاقتى كومەكتەسىپ, قولداۋ كورسەتكەن قازاقستان حالقىنا شەكسىز ريزاشىلىعىن ءبىلدىردى. بۇل تۋرالى minval.az حابارلادى, دەپ جازادى qandastar.kz

«ولار ءوز ومىرلەرىن قاتەرگە تىكتى, سەبەبى كەلەسى جارىلىستىڭ بولاتىنىن نەمەسە بولمايتىنىن بىلمەدى. ۇشاقتىڭ ءبىر بولىگى ورتەنىپ جاتتى, ەكىنشى بولىگى دە جانىپ كەتۋى مۇمكىن ەدى. بىراق سوعان قاراماستان ولار ناعىز ەرلىك كورسەتتى. بۇل رەتتە مەديتسينا قىزمەتكەرلەرىنىڭ ەڭبەگى وتە قۇندى بولدى. زارداپ شەككەن جولاۋشىلار دەرەۋ مەديتسينالىق مەكەمەلەرگە جەتكىزىلدى. بۇل ءۇشىن مەن پرەزيدەنت توقاەۆقا دا ريزاشىلىعىمدى ءبىلدىردىم. قازاق باۋىرلارىمىزدىڭ ىنتىماعى, مەن بىلەتىندەي, ءازىربايجان حالقىنىڭ جۇرەگىندە تەرەڭ ءىز قالدىردى. قاراپايىم ازاماتتار اقتاۋداعى ەلشىلىگىمىزگە گۇل شوقتارىن قويىپ, بىزگە دەگەن كوزقاراستارى مەن ىنتىماقتاستىعىن ءبىلدىردى. مىنە, ناعىز دوستىق پەن باۋىرلاستىق.

ءبىز حالىقارالىق ساراپتامانى قولدايمىز جانە بۇل ماسەلەنى مەملەكەتارالىق اۆياتسيالىق كوميتەتتىڭ قۇزىرىنا بەرە المايمىز. بۇل ۇستانىم تۇسىنىستىكپەن قابىلداندى. ارينە, ءبىزدىڭ مەملەكەتتىك ورگانداردىڭ وكىلدەرى, كوميسسيا مۇشەلەرى مەن باسشىلارى, پروكۋراتۋرا وكىلدەرى ۇنەمى بايلانىستا. قازاقستان دا ءوز كەزەگىندە مەملەكەتتىك كوميسسيا قۇردى, بۇل تۋرالى ماعان اڭگىمە بارىسىندا پرەزيدەنت توقاەۆ ايتتى. ولار, ارينە, قىزىعۋشىلىق تانىتىپ, بولعان وقيعانىڭ بارلىق ءمان-جايىن انىقتاۋعا تىرىسۋدا.

وسى رەتتە مەن پرەزيدەنت توقاەۆقا قايعىلى وقيعا سالدارىنان قازاقستاننىڭ التى ازاماتى قازا تاپقانىنا بايلانىستى كوڭىل ايتتىم. ول دا ماعان كوڭىل ايتتى. بۇل وقيعا قانشالىقتى قايعىلى بولعانىمەن, بۇل دا ءبىر سىناق. بۇل جاعداي ءار تاراپتىڭ قالاي ارەكەت ەتەتىنى جونىندەگى سىناق. مەن وسى قايعىلى جاعدايعا قاراماستان, قازاقستان دا وسىنداي پىكىردى ۇستاناتىنىنا سەنىمدىمىن. ءبىزدىڭ دوستىعىمىز بەن باۋىرلاستىعىمىز وسى اۋىر سىناقتان كەيىن كۇشەيە ءتۇستى», –  دەدى يلحام اليەۆ ازەربايجان تەلەارناسىنا بەرگەن سۇحباتىندا.