الەم جاڭالىقتارىجاڭالىقتار
يلون ماسك Apple جانە OpenAI كومپانيالارىن سوتقا بەرىپ, ميللياردتاعان دوللار تالاپ ەتتى
يلون ماسك AI سالاسىنداعى باسەكەلەستىككە كەدەرگى كەلتىرگەنى ءۇشىن Apple Inc. جانە OpenAI كومپانيالارىن سوتقا بەردى, دەپ حابارلايدى Qandastar.kz Bloomberg باسىلىمىنا سىلتەمە جاساپ.
كاسىپكەردىڭ X جانە xAI كومپانيالارى وتەماقى رەتىندە ميللياردتاعان دوللار تالاپ ەتىپ وتىر.
«Apple-ءدىڭ ارەكەتى جاساندى ينتەللەكتىڭ (AI) دامۋىنا جانە سۋپەرقوسىمشالاردىڭ پايدا بولۋىنا كەدەرگى جاساپ وتىر. بۇل جاعداي OpenAI-عا مونوپوليانى ساقتاۋعا مۇمكىندىك بەرەدى. ال باسقا كومپانيالاردىڭ جاڭا جوبالارى مەن ينۆەستيتسيالارىن تەجەيدى. مۇنداي چات-بوتتار بولاشاقتا iPhone-نىڭ نەگىزگى فۋنكتسيالارىن دا الماستىرا الاتىن ونىمگە اينالار ەدى», – دەلىنگەن تالاپ ارىزدا.
ماسك اقشالاي وتەماقىدان (ناقتى سوماسى كورسەتىلمەگەن) بولەك, Apple مەن OpenAI-دىڭ مۇنداي ىنتىماقتاستىعىنا تىيىم سالۋدى تالاپ ەتتى. ايفون ءوندىرۋشى كومپانيا OpenAI-مەن ChatGPT-ءدى Apple Intelligence جۇيەسىنە iOS 18 ارقىلى بىرىكتىرۋ جونىندەگى كەلىسىمىن بىلتىر جاريالاعان ەدى. OpenAI وكىلدەرى مۇنى «ماسك تاراپىنان جۇرگىزىلىپ كەلە جاتقان قۋدالاۋ ارەكەتىنىڭ جالعاسى» دەپ اتادى.
ماسك ۇزاق ۋاقىتتان بەرى كومپانيا باسشىسى سەم التمانمەن جانجالداسىپ كەلەدى. ەكەۋى دە 2015 جىلى OpenAI-دىڭ نەگىزىن قالاۋشىلاردىڭ قاتارىندا بولدى. الايدا كەلىسپەۋشىلىكتەرگە بايلانىستى ماسك ءۇش جىلدان كەيىن ديرەكتورلار كەڭەسىنەن شىقتى.
11 تامىزدا ماسك Twitter-دە Apple-ءدى «انتيمونوپوليالىق زاڭنامانى بۇزدى» دەپ ايىپتاپ, كومپانيا «OpenAI-دان باسقا ەشبىر جاساندى ينتەللەكت فيرماسىنا App Store-دا ءبىرىنشى ورىنعا شىعۋعا مۇمكىندىك بەرمەيدى» دەپ جازدى.
ال التمان وعان جاۋاپ رەتىندە ماسك «X پلاتفورماسىن ءوزىنىڭ جانە كومپانيالارىنىڭ مۇددەسى ءۇشىن پايدالانىپ, وزىنە جاقپايتىن باسەكەلەستەرىنە جانە ادامدارعا زيان كەلتىرىپ وتىر» دەگەن پىكىر ءبىلدىردى.
