يلون ماسك رەسەيدەن ساياسي باسپانا سۇرادى – رەسەي ءسىم ءوتىنىش العانىن راستادى

اقش-تىڭ ايگىلى كاسىپكەرى ءارى ميللياردەرى يلون ماسك رەسەيدەن ساياسي باسپانا سۇرادى. بۇل تۋرالى رف مەملەكەتتىك دۋماسى توراعاسىنىڭ ورىنباسارى ۆلاديسلاۆ داۆانكوۆ NEWS.ru باسىلىمىنا مالىمدەگەن, دەپ حابارلايدى Qandastar.kz اقپارات پورتالى. ونىڭ ايتۋىنشا, قازىر سىرتقى ىستەر مينيسترلىگى ماسكتىڭ ءوتىنىشىن قاراپ جاتىر, ال جاۋاپ ءبىر ايدىڭ ىشىندە بەرىلمەك.

«يلون ماسك كەي تۇستا قاتەلىك جىبەرگەن شىعار, بىراق ونداي قاتەلىكتەردى كەشىرۋگە بولادى دەپ ويلايمىن. ەگەر ءبارى ءساتسىز بولسا, ءبىز ونى ارقاشان قابىلداۋعا دايىنبىز. تەحنولوگيالىق تۇرعىدان دا, بولاشاققا كوزقاراسى جاعىنان دا ول – كەرەمەت ادام», دەدى داۆانكوۆ سانكت-پەتەربۋرگ حالىقارالىق ەكونوميكالىق فورۋمىندا سويلەگەن سوزىندە.

يلون ماسك بۇل اقپاراتقا قاتىستى ازىرگە ەشقانداي رەسمي پىكىر بىلدىرگەن جوق.

بۇعان دەيىن ول X (بۇرىنعى Twitter) الەۋمەتتىك جەلىسىندە رەسەي قاۋىپسىزدىك كەڭەسى توراعاسىنىڭ ورىنباسارى دميتري مەدۆەدەۆتىڭ ءازىلىن باعالاپ, ءوزىنىڭ اقش-تىڭ بۇرىنعى پرەزيدەنتى دونالد ترامپپەن «Starlink اكتسيالارى ءۇشىن» تاتۋلاسۋعا دايىن ەكەنىن مەڭزەگەن جازباسىنا جاۋاپ بەرگەن ەدى.

سونداي-اق, ماسك بۇعان دەيىن يران اۋماعىندا Starlink سپۋتنيكتىك ينتەرنەتىن ىسكە قوسقانىن حابارلاعان بولاتىن.