جاڭالىقتار
يلون ماسك ترامپقا يمپيچمەنت جاريالاۋ يدەياسىنا قولداۋ ءبىلدىردى
فوتو: اشىق دەرەككوزدەن
تانىمال امەريكالىق كاسىپكەر, SpaceX جانە Tesla كومپانيالارىنىڭ نەگىزىن قالاۋشى يلون ماسك اقش پرەزيدەنتى دونالد ترامپقا يمپيچمەنت جاريالاۋ جانە ونى ۆيتسە-پرەزيدەنت دج.د. ۆەنسكە اۋىستىرۋ يدەياسىن قولدادى. بۇل ۇسىنىستى الەۋمەتتىك جەلىدە بلوگەر يان مايلز چونگ كوتەرگەن بولاتىن, دەپ حابارلايدى Qandastar.kz اقپارات پورتالى.
ماسك چونگتىڭ جاريالانىمىنا X (بۇرىنعى Twitter) الەۋمەتتىك جەلىسىندە قىسقا عانا ء“يا” دەپ جاۋاپ بەرىپ, بۇل ۇسىنىسقا قولداۋ ءبىلدىردى.
بۇعان دەيىن ترامپ Truth Social پلاتفورماسىندا ماسكتىڭ كومپانيالارىمەن جاسالعان مەملەكەتتىك كەلىسىمشارتتاردى بۇزۋ جانە وعان بەرىلەتىن سۋبسيديالاردى جويۋ ارقىلى مەملەكەتتىك بيۋدجەتتەن ميللياردتاعان دوللار ۇنەمدەۋگە بولاتىنىن مالىمدەگەن ەدى.
پرەزيدەنتتىڭ مەنىڭ مەملەكەتتىك كەلىسىمشارتتارىمنىڭ كۇشىن جويۋ تۋرالى مالىمدەمەسىن ەسكەرە وتىرىپ, SpaceX ءوزىنىڭ Dragon عارىش اپپاراتتارىن دەرەۋ توقتاتا باستايدى, – دەپ جاۋاپ بەردى ماسك ترامپتىڭ بۇل مالىمدەمەسىنە.
ايتا كەتەيىك, ءدال وسى Dragon كەمەلەرى اقش-تىڭ حالىقارالىق عارىش ستانساسىنا (حعس) استروناۆتار مەن جۇك جەتكىزۋ باعدارلاماسىنىڭ ماڭىزدى بولىگى بولىپ تابىلادى.
سوڭعى ۋاقىتتا يلون ماسك اق ءۇي اكىمشىلىگىمەن كەلىسپەۋشىلىكتەرىن اشىق ءبىلدىرىپ كەلەدى. ول 1 ماۋسىمدا ءوزىنىڭ قازىرگى ساياساتپەن «ەشبىر باعىتتا كەلىسپەيتىنىن» اشىق جازعان بولاتىن.
