يلون ماسكتىڭ ينتەرنەتى قازاقستاندا رەسمي جۇمىس ىستەي باستادى

فوتو: Keystone Press Agency

تسيفرلىق دامۋ مينيسترلىگى يلون ماسككە تيەسىلى Starlink كومپانياسى 13 تامىزدان باستاپ قازاقستان رەسپۋبليكاسى اۋماعىندا سپۋتنيكتىك ينتەرنەت قىزمەتتەرىن رەسمي تۇردە ۇسىنا باستاعانىن مالىمدەدى, دەپ جازدى qandastar.kz

بۇل تۋرالى Stan.kz اقپارات اگەنتتىگى حابارلايدى.

مينيسترلىك مالىمەتىنشە, بۇل ەل تۇرعىندارىنا SpaceX كومپانياسىنا تيەسىلى تومەن وربيتالى Starlink سپۋتنيكتەرى جەلىسى ارقىلى جوعارى جىلدامدىقتى جانە سەنىمدى ينتەرنەتكە قوسىلۋعا مۇمكىندىك بەرەدى.

2025 جىلعى 12 ماۋسىمدا قازاقستان رەسپۋبليكاسىنىڭ تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى مەن Starlink كومپانياسى قىزمەت كورسەتۋ بارىسىندا قازاقستان زاڭناماسىن تولىق ساقتاۋ جونىندە كەلىسىمگە قول قويدى. بۇل كەلىسىم اقپاراتتىق قاۋىپسىزدىك پەن بايلانىس سالاسىنداعى بارلىق تالاپتىڭ ورىندالۋىن قامتيدى.

«Starlink تەحنولوگياسى شالعاي جانە قولجەتىمدىلىگى قيىن ايماقتاردا دا تۇراقتى ينتەرنەت قوسىلۋىن قامتاماسىز ەتىپ, حالىققا زاماناۋي تسيفرلىق سەرۆيستەردى پايدالانۋعا مۇمكىندىك بەرەدى», – دەلىنگەن ۆەدومستۆو حابارلاماسىندا.

تاريفتەر, قوسىلۋ شارتتارى جانە قوسىمشا اقپارات SpaceX كومپانياسىنىڭ رەسمي سايتىندا جاريالاندى.