Imam ánshi Abaı Begeıdiń kámelet jasqa tolmaǵan qyzynyń nekesin qımaǵan – QMDB

Foto: Instagram/abai_begei

Qazaqstan musylmandary dinı basqarmasynyń Mańǵystaý oblysy boıynsha ókildiginiń kámeletke tolmaǵan qyzdyń nekesine qatysty taraǵan aqparattarǵa túsinikteme berdi, dep habarlaıdy Qaz365.kz.

Aqparatty basqarmanyń resmı ókili Aǵabek Qonarbaıuly taratty. Aqtaý qalasynda kámelet jasqa tolmaǵan qyzdyń nekesine qatysty áleýmettik jelide taraǵan aqparatqa qatysty Qazaqstan musylmandary dinı basqarmasynyń Mańǵystaý oblysy boıynsha ókildigi tómendegini málimdeıdi:

«Neke qııý rásimi meshitte bolmaǵany anyqtaldy. Meshit ımamdary kámelet jasqa tolmaǵan qyzdyń nekesin qımaǵan. Meshitke kelip, qulshylyq úıin aralaýǵa, aýlasynda sýretke túsýge shekteý qoıylmaıdy. Jastardyń meshitke kelip, estelikke sýretke túskeni belgili boldy», – deıdi ol.

Qazaqstan musylmandary dinı basqarmasynyń qabyldaǵan «Meshit ımamdarynyń neke qııý tártibi» qujatyna sáıkes otbasy qurǵysy keletin azamattar áýeli AHAT bólimi arqyly zańdy nekege otyrýy tıis. Nıke qııý rásimine bolashaq erli-zaıyptylardyń ata-anasy nemese olardyń zańdy ókilderi qatysýy mindetti. Dinı nekege ata-analarynyń nemese zańdy ókilderiniń kelisimi kerek. Olaı bolmaǵan jaǵdaıda meshitte dinı neke qıylmaıdy.

Eske sala keteıik, buǵan deıin áleýmettik jelide Abaı Begeıdiń toǵyzynshy synyp bitirgen qyzy kúıeýge tıgeni jaıly aqparat taraǵan edi.