جاڭالىقتار
«يمام بالا قاعىپ ءولتىردى»: قمدب وقيعاعا قاتىستى جاۋاپ بەردى
فوتو: اشىق دەرەككوز
اباي وبلىسىندا بالا قاعىپ ولتىرگەن يمام تۋرالى قمدب جاۋاپ بەردى, دەپ حابارلايدى qandastar.kz Orda.kz-كە سىلتەمە جاساپ.
وقىس وقيعا 14 قازان كۇنى ساعات 11:50 شاماسىندا بولعان. اباي وبلىسى ءۇرجار اۋدانى ءۇرجار اۋىلدىق مەشىتىنىڭ يمامى اقجىگىتوۆ قايىربەك ابايسىزدا جەكە كولىگىمەن 11 جاستاعى قىزدى قاعىپ كەتكەن. ءوزىنىڭ جانە كۋاگەرلەردىڭ ايتۋىنشا, يمام كولىك جىلدامدىعىن ساعاتىنا 40 كم/ساعاتتان اسىرماعان كورىنەدى.
الدىن الا مالىمەت بويىنشا, قىز بالا جول جيەگىندە كەتىپ بارا جاتقاندا ءيتتىڭ ۇرگەنىنەن شوشىپ جولعا جۇگىرىپ شىققاندىعى ايتىلىپ جاتىر. سول ساتتە جۇرگىزۋشى قايىربەك يمام كولىكتى توقتاتىپ ۇلگەرمەگەن. وقيعا بولعاننان كەيىن يمام قىزدى اۋرۋحاناعا جەتكىزگەن. وكىنىشكە قاراي جاس قىز اۋىر جاراقاتتان وتا ۇستىندە قايتىس بولدى.
«وقيعاعا بايلانىستى تەرگەۋ جۇمىستارى جۇرگىزىلىپ جاتىر. قايىربەك يمام 10 جىلدان اسا ۋاقىتتان بەرى ءۇرجار اۋىلدىق مەشىتىندە قىزمەت ىستەپ كەلە جاتىر» دەلىنگەن قمدب حابارلاماسىندا.
ەسكە سالايىق, بۇعان دەيىن اباي وبلىسىندا 44 جاستاعى يمام مەكتەپ وقۋشىسىن قاعىپ ولتىرگەنى تۋرالى حابارلاعان ەدىك.
