يمام توقال الۋ ءۇشىن ەشكىمنەن رۇقسات سۇراماۋ كەرەكتىگىن ايتتى

فوتو:سكرين

جەلىدە يمام عازيز احمەتتىڭ كوپ ايەل الۋعا قاتىستى ايتقان پىكىرى تارادى. يمامنىڭ ايتۋىنشا, يسلام دىنىندە ەر ادام كوپ ايەل الۋ ءۇشىن ەشكىمنەن رۇقسات سۇرامايدى, دەپ حابارلايدى qandastar.kz

«ەركەكتىڭ ءبىر ايەل الىپ توقتاۋى دەگەن نارسە مۇسىلمانشىلىقتان ەمەس. جانە ول وزگە دىندەردە دە سولاي, تەك حريستيان دىنىندە عانا ءبىر ەركەك ءبىر ايەل الۋ كەرەك. باسقا دىندەردىڭ بارلىعىندا ءبىر ەركەك ەشقاشان ءبىر ايەل توقتاعان ەمەس. ءتىپتى, ادام ەمەس, وزگە دە حايۋاناتتاردى الاتىن بولساڭىز, بارلىعىندا ۇرعاشىسى كوپ بولادى, ەركەگى بىرەۋ بولادى. ول بەلگىلى نارسە. ادام دا اللا تاعالا جاراتقان جاراتىلىستىڭ ءبىرى عوي. ادامعا دا, ءبىر ەركەكتىڭ ءتورت ايەل الۋىنا رۇقسات بەردى. بۇل رۇقسات اللا تاعالادان بولعانى ءۇشىن بۇعان وزگە ەشكىمنىڭ رۇقساتى كەرەك ەمەس. شىن قاراي الاتىن بولسا, سونى الادى. ايەلىنەن دە, اكە-شەشەسىنەن دە, باسقا ادامداردان دا رۇقسات سۇرامايدى. ەركەكتىڭ ءوز شەشىمىمەن بولادى», — دەيدى ول.

ۆيدەونى ءوزىنىڭ Instagram پاراقشاسىندا جاريالاعان بلوگەر قايرات قوجانوۆ بۇنداي پىكىرلەر قانشاما وتباسىنىڭ ويران بولۋىنا سەبەپكەر بولاتىنىن ايتىپ, دابىل قاقتى.

«باسقا ۋاعىزبەن توقتاۋعا بولماي ما? وسى ءبىر اڭگىمە ارقىلى قانشا وتباسى شىرقى بۇزىلادى! قالايشا ەركەك ايەلدەن, اتا انادان رۇقسات سۇراماي بىرنەشە جار الۋعا بولادى دەيدى. بۇل اڭگىمە قايدا الىپ بارادى?

عازيز مىرزا مەملەكەتتىك ءدىني باسقارمانىڭ رانت مۇشەسى. ءبىلىمدى كىسى ەكەنى انىق! بىراق وسى ۆيدەوسىن بىرنەشە ادام جىبەردى. سالماسقا امال بولمادى. وسىعان دەيىن دە ەكى-ءۇش ايەل الۋعا قاتىستى پوستتارعا كوممەنتاري وسىعان ۇقساس پىكىر جازعانىن كورگەنمىن.

نە ءۇشىن سالدىم. مەنىڭ قارىنداسىم, ءىنىم, بالام جانە قىزىم بار. مىناداي قازاقستان رەسپۋبليكاسىنىڭ زاڭىنا قايشى ۋاعىز ايتىپ يسلام ءدىنىن جيىركەنىشتى كورسەتەسىڭدەر. ءوزىڭ الساڭ ال نەشەۋ بولسا دا. جاقىنىڭدى بەر بىرەۋدىڭ سوڭعى ءتسيفرى ەتىپ. ءوتىنىش بۇنداي ۇگىت جاساماڭدارشى اعالار!», — دەپ جازدى ول.