Imam toqal alý úshin eshkimnen ruqsat suramaý kerektigin aıtty

Foto:skrın

Jelide ımam Ǵazız Ahmettiń kóp áıel alýǵa qatysty aıtqan pikiri tarady. Imamnyń aıtýynsha, ıslam dininde er adam kóp áıel alý úshin eshkimnen ruqsat suramaıdy, dep habarlaıdy qandastar.kz

«Erkektiń bir áıel alyp toqtaýy degen nárse musylmanshylyqtan emes. Jáne ol ózge dinderde de solaı, tek hrıstıan dininde ǵana bir erkek bir áıel alý kerek. Basqa dinderdiń barlyǵynda bir erkek eshqashan bir áıel toqtaǵan emes. Tipti, adam emes, ózge de haıýanattardy alatyn bolsańyz, barlyǵynda urǵashysy kóp bolady, erkegi bireý bolady. Ol belgili nárse. Adam da Alla Taǵala jaratqan jaratylystyń biri ǵoı. Adamǵa da, bir erkektiń tórt áıel alýyna ruqsat berdi. Bul ruqsat Alla Taǵaladan bolǵany úshin buǵan ózge eshkimniń ruqsaty kerek emes. Shyn qaraı alatyn bolsa, sony alady. Áıelinen de, áke-sheshesinen de, basqa adamdardan da ruqsat suramaıdy. Erkektiń óz sheshimimen bolady», — deıdi ol.

Vıdeony óziniń Instagram paraqshasynda jarııalaǵan bloger Qaırat Qojanov bundaı pikirler qanshama otbasynyń oıran bolýyna sebepker bolatynyn aıtyp, dabyl qaqty.

«Basqa ýaǵyzben toqtaýǵa bolmaı ma? Osy bir áńgime arqyly qansha otbasy shyrqy buzylady! Qalaısha erkek áıelden, ata anadan ruqsat suramaı birneshe jar alýǵa bolady deıdi. Bul áńgime qaıda alyp barady?

Ǵazız myrza Memlekettik dinı basqarmanyń RANT múshesi. Bilimdi kisi ekeni anyq! Biraq osy vıdeosyn birneshe adam jiberdi. Salmasqa amal bolmady. Osyǵan deıin de eki-úsh áıel alýǵa qatysty posttarǵa kommentarıı osyǵan uqsas pikir jazǵanyn kórgenmin.

Ne úshin saldym. Meniń qaryndasym, inim, balam jáne qyzym bar. Mynadaı Qazaqstan Respýblıkasynyń zańyna qaıshy ýaǵyz aıtyp ıslam dinin jıirkenishti kórsetesińder. О́ziń alsań al nesheý bolsa da. jaqynyńdy ber bireýdiń sońǵy ıfri etip. О́tinish bundaı úgit jasamańdarshy aǵalar!», — dep jazdy ol.