«يمامدار قوڭىز تەرىپ كەتتى». تۇركىستان وبلىسىنىڭ باس يمامى داۋلى جازباعا جاۋاپ بەردى

فوتو: muftyat.kz

الەۋمەتتىك جەلىدە باس ءمۇفتي ناۋرىزباي قاجى تاعان ۇلىنىڭ تۇركىستان وبلىسىنا ساپارىنا ءوڭىردىڭ قاراپايىم يمامدارى اقشا جيناعانى تۋرالى اقپارات تاراپ كەتتى.

Massaget.kz ءتىلشىسى تۇركىستان وبلىسىنىڭ باس يمامىنا ماسەلەگە وراي ساۋال جولدادى.

«يمامدار «قوڭىز تەرىپ, قينالىپ كەتتى» – جەلى قولدانۋشىسى

وراز الىمبەكوۆ ەسىمدى جەلى قولدانۋشىسى باس ءمۇفتي مەن تۇركىستان وبلىسىنىڭ باس يمامىنا قاتىستى جازبا جاريالادى. ونىڭ سوزىنشە, تۇركىستان وبلىسىنىڭ يمامدارى وڭىردەگى جاعدايدى ايتىپ, حابارلاسقان. يمامدار «وڭىرگە باس ءمۇفتي ناۋرىزباي وتپەنوۆ كەلگەن سايىن وبلىستىڭ جاڭادان تاعايىندالعان باس يمامى ەرجان تولەپوۆ اقشا جينايتىنىن» ايتىپ, شاعىمدانعان.

«باس ءمۇفتيدىڭ 2024 جىلدىڭ قاڭتار ايىنىڭ سوڭىندا تۇركىستانعا بارعان 2 كۇندىك رەسمي ساپارىنا ارناپ وبلىستاعى 17 اۋدان جانە قالا يمامدارىنىڭ اربىرىنەن 150 مىڭ مەن 300 مىڭ تەڭگە ارالىعىندا اقشا جينالدى. اۋدان يمامى قاراپايىم مولدالارعا سالماق سالادى. ولار اقشا ىزدەپ, تەنتىرەپ كەتەدى… وسىلاي جينالعان قارجىنى اۋدان يمامدارى باس يمام ە.تولەپوۆ پەن ونىڭ ءىس باسقارۋشىسى قىزمەتىن اتقاراتىن ءالىمحاننىڭ كاسپي گولدىنا اۋدارىپ تۇردى (دالەلدى چەكتەردىڭ كوشىرمەسى تومەندە تۇر). كەيبىرى قولما-قول اقشا اكەپ بەردى. مىسالى, سوزاق اۋدانىنىڭ باس يمامى مەيرامبەك قاجى وبلىستىڭ باس يمامىنا قولما-قول 150 مىڭ تەڭگە اكەپ بەرىپ, كەيىن «بۇل از» دەگەن سوڭ 130 مىڭدى كاسپي گولدىنا اۋدارعان», – دەپ جازدى وراز الىمبەكوۆ.

جازبا اۆتورىنىڭ ايتۋىنشا, بۇل قارجىنىڭ ءبارى تۇركىستانعا ساپارلاپ كەلگەن باس ءمۇفتيدىڭ ۇشاقپەن ارى-بەرى ۇشۋىنا, قىمبات قوناق ۇيدە تۇرىپ, قىمبات مەيرامحانادان اۋقاتتانۋىنا جۇمسالادى ەكەن.

«حازىرەت مۇباراك ءجۇزىن تۇركىستاندىق جاماعاتقا كورسەتكەنى ءۇشىن» دە حاديا (سىيلىق) بەرىلەدى. ونىڭ پارقى مەن نارقى – 2 ميلليون. ارينە, جينالعان اقشا تۇگەلىمەن باس ءمۇفتيدىڭ تۇركىستانعا كەلىپ-كەتۋىنە جۇمسالماعان شىعار. بىراق وبلىستىڭ باس يمامى ە.تولەپوۆ قانشا اقشا قايدا جۇمسالعانى, قانشا اقشا ارتىلىپ قالعانى جونىندە قاراپايىم مولدالارعا ەسەپ بەرگەن ەمەس, بەرمەيدى دە. سەبەبى باس ءمۇفتي ن.وتپەنوۆ ەرجان تولەپوۆتى اتتاي قالاپ, وسى وبلىسقا بىلتىر كوكتەمدە باس يمام قىلىپ قويعان. وبلىستىڭ بۇرىنعى يمامى – ءال-ازھار ۋنيۆەرسيتەتىنىڭ تۇلەگى, Phd دوكتورى ەركەبۇلان قاراقۇلوۆ باس مۇفتيگە جاقپادى. تۇركىستانعا دەيىن ەكى وبلىستا باس يمام بولعان ە.قۇراقۇلوۆ ە.تولەپوۆ سەكىلدى قاراپايىم يمامداردان ءبۇيتىپ اقشا جينامايتىن. سوندىقتان بولسا كەرەك, بىلتىر كوكتەمدە ونى وبلىستىڭ باس يمامى قىزمەتىنەن الىپ تاستادى. ونىڭ ورنىنا باس يمامدىق تاجىريبەسى جوق ە.تولەپوۆتى اكەلىپ قويدى. وسىدان كەيىن باس ءمۇفتي تۇركىستانعا ءجيى ساپارلايتىن ادەت شىعارىپ الدى. ال تۇركىستاندىق قاراپايىم يمامدار وڭىرگە ساپارلاپ كەلەتىن مۇفتيلەردىڭ ءىشىم-جەمىنە, كەلىپ-كەتۋىنە اقشا جيناپ, ابدەن قينالىپ كەتتى», – دەدى ول.

تۇركىستاننىڭ باس يمامى نە دەپ جاۋاپ بەردى?

تۇركىستان وبلىسىنىڭ باس يمامى ەرجان تولەپوۆ ماسەلەگە وراي جاۋاپ بەرىپ, تاراعان اقپارات جالعان ەكەنىن ايتتى.

«اۆتور جازباسىندا باس ءمۇفتيدىڭ تۇركىستان وبلىسىنا كەلگەن ساپارىنا وراي ءوڭىر يمامدارىنان اقشا جيناۋ ارەكەتى بولعانىن جازىپتى. ءبىز بۇل اقپاراتتى جوققا شىعارامىز جانە ونىڭ شىندىققا جاناسپايتىنىن مالىمدەيمىز. وسى رەتتە ايتا كەتەر جايت: يمامدار ءتيىمدى باعامەن مەشىت ارقىلى گازەت-جۋرنالعا جازىلادى. كەيبىر ءدىن قىزمەتكەرلەرى بىلمەستىكپەن كاسپي گولد ارقىلى گازەت-جۋرنال اقشاسىن ماعان اۋدارعان ەكەن. بولعان جاعدايعا بايلانىستى ارنايى جينالىس وتكىزىپ, ءتۇسىندىرۋ جۇمىستارىن جۇرگىزدىم.

وسى جاعدايدى نەگىز ەتكەن جازبا اۆتورى وقىرمانداردىڭ كوكەيىنە كۇماندى ويلار سالىپ, شىندىققا جاناسپايتىن اقپاراتتاردى تاراتىپتى. اۆتوردىڭ شەكتەن شىققان ءىسىن ءوزىنىڭ ارى مەن ۇياتىنا قالدىرامىز. ال وقىرمانداردى تەك راستالعان اقپارات كوزدەرىنەن مالىمەت الۋعا شاقىرامىز», – دەپ جاۋاپ بەردى ول.