«Imamdar qońyz terip ketti». Túrkistan oblysynyń bas ımamy daýly jazbaǵa jaýap berdi

Foto: muftyat.kz

Áleýmettik jelide Bas múftı Naýryzbaı qajy Taǵanulynyń Túrkistan oblysyna saparyna óńirdiń qarapaıym ımamdary aqsha jınaǵany týraly aqparat tarap ketti.

Massaget.kz tilshisi Túrkistan oblysynyń bas ımamyna máselege oraı saýal joldady.

«Imamdar «qońyz terip, qınalyp ketti» – jeli qoldanýshysy

Oraz Álimbekov esimdi jeli qoldanýshysy Bas múftı men Túrkistan oblysynyń bas ımamyna qatysty jazba jarııalady. Onyń sózinshe, Túrkistan oblysynyń ımamdary óńirdegi jaǵdaıdy aıtyp, habarlasqan. Imamdar «óńirge Bas múftı Naýryzbaı О́tpenov kelgen saıyn oblystyń jańadan taǵaıyndalǵan bas ımamy Erjan Tólepov aqsha jınaıtynyn» aıtyp, shaǵymdanǵan.

«Bas múftıdiń 2024 jyldyń qańtar aıynyń sońynda Túrkistanǵa barǵan 2 kúndik resmı saparyna arnap oblystaǵy 17 aýdan jáne qala ımamdarynyń árbirinen 150 myń men 300 myń teńge aralyǵynda aqsha jınaldy. Aýdan ımamy qarapaıym moldalarǵa salmaq salady. Olar aqsha izdep, tentirep ketedi… Osylaı jınalǵan qarjyny aýdan ımamdary bas ımam E.Tólepov pen onyń is basqarýshysy qyzmetin atqaratyn Álimhannyń kaspı goldyna aýdaryp turdy (dáleldi chekterdiń kóshirmesi tómende tur). Keıbiri qolma-qol aqsha ákep berdi. Mysaly, Sozaq aýdanynyń bas ımamy Meırambek qajy oblystyń bas ımamyna qolma-qol 150 myń teńge ákep berip, keıin «bul az» degen soń 130 myńdy kaspı goldyna aýdarǵan», – dep jazdy Oraz Álimbekov.

Jazba avtorynyń aıtýynsha, bul qarjynyń bári Túrkistanǵa saparlap kelgen Bas múftıdiń ushaqpen ary-beri ushýyna, qymbat qonaq úıde turyp, qymbat meıramhanadan aýqattanýyna jumsalady eken.

«Haziret múbárak júzin túrkistandyq jamaǵatqa kórsetkeni úshin» de hadııa (syılyq) beriledi. Onyń parqy men narqy – 2 mıllıon. Árıne, jınalǵan aqsha túgelimen Bas múftıdiń Túrkistanǵa kelip-ketýine jumsalmaǵan shyǵar. Biraq oblystyń bas ımamy E.Tólepov qansha aqsha qaıda jumsalǵany, qansha aqsha artylyp qalǵany jóninde qarapaıym moldalarǵa esep bergen emes, bermeıdi de. Sebebi Bas múftı N.О́tpenov Erjan Tólepovti attaı qalap, osy oblysqa byltyr kóktemde bas ımam qylyp qoıǵan. Oblystyń burynǵy ımamy – Ál-Azhar ýnıversıtetiniń túlegi, Phd doktory Erkebulan Qaraqulov Bas múftıge jaqpady. Túrkistanǵa deıin eki oblysta bas ımam bolǵan E.Quraqulov E.Tólepov sekildi qarapaıym ımamdardan búıtip aqsha jınamaıtyn. Sondyqtan bolsa kerek, byltyr kóktemde ony oblystyń bas ımamy qyzmetinen alyp tastady. Onyń ornyna bas ımamdyq tájirıbesi joq E.Tólepovti ákelip qoıdy. Osydan keıin Bas múftı Túrkistanǵa jıi saparlaıtyn ádet shyǵaryp aldy. Al túrkistandyq qarapaıym ımamdar óńirge saparlap keletin múftılerdiń ishim-jemine, kelip-ketýine aqsha jınap, ábden qınalyp ketti», – dedi ol.

Túrkistannyń bas ımamy ne dep jaýap berdi?

Túrkistan oblysynyń bas ımamy Erjan Tólepov máselege oraı jaýap berip, taraǵan aqparat jalǵan ekenin aıtty.

«Avtor jazbasynda Bas múftıdiń Túrkistan oblysyna kelgen saparyna oraı óńir ımamdarynan aqsha jınaý áreketi bolǵanyn jazypty. Biz bul aqparatty joqqa shyǵaramyz jáne onyń shyndyqqa janaspaıtynyn málimdeımiz. Osy rette aıta keter jaıt: ımamdar tıimdi baǵamen meshit arqyly gazet-jýrnalǵa jazylady. Keıbir din qyzmetkerleri bilmestikpen kaspı gold arqyly gazet-jýrnal aqshasyn maǵan aýdarǵan eken. Bolǵan jaǵdaıǵa baılanysty arnaıy jınalys ótkizip, túsindirý jumystaryn júrgizdim.

Osy jaǵdaıdy negiz etken jazba avtory oqyrmandardyń kókeıine kúmándi oılar salyp, shyndyqqa janaspaıtyn aqparattardy taratypty. Avtordyń shekten shyqqan isin óziniń ary men uıatyna qaldyramyz. Al oqyrmandardy tek rastalǵan aqparat kózderinen málimet alýǵa shaqyramyz», – dep jaýap berdi ol.