يمان حەليف: بوكسشى جارىق دۇنيەگە ەركەك بوپ كەلمەگەن – نۇربەك ءتۇسىپحان

فوتو: اشىق دەرەككوز

ازاتتىق راديوسى AzatNEWS جاڭالىقتار باعدارلاماسىنىڭ پروديۋسەرى ءارى جۇرگىزۋشىسى نۇربەك ءتۇسىپحان ءوزىنىڭ Facebook الەۋمەتتىك پاراقشاسىندا وسىلاي دەدى, دەپ جازادى Qandastar.kz.

«يمان حەليفتەن ۇيالمادىڭىزدار ما? سونىمەن وتىرىك پەن شىندى ارالاستىرىپ, ءبىراز جەرگە دەيىن باردىڭىزدار. بوكسشى جارىق دۇنيەگە ەركەك بوپ كەلمەگەن ەكەن جانە جىنىسىن دا وزگەرتپەپتى. بارى – اللا تاعالا ونىڭ ەركەكتىك گارموندارىن كۇشتى ەتىپ جاراتىپتى. انادان تۋعاندا سولاي دەسەدى. ايىپ پا سول? اللا مەن اناسىن كىنالايسىزدار ما ەندى? بۇعان دەيىن 2020 جىلعى (2021 جىلى ءوتتى) توكيو وليمپياداسىنا دا قاتىسىپتى. اراب ەلدەرى اراسىنداعى ءتۇرلى تۋرنيرلەردە دە توپ جارىپ ءجۇرىپتى.

جەلىدە ءبىرازىڭىز قاتتى پىكىر ايتتىڭىزدار. اراسىندا ءدىن ۇستاعان, اۋزىنان اللاسى تۇسپەيتىن تالاي ادام يمان حەليفتىڭ سىرتىنان «مالعۇن», «شايتان», «ازعىن» ت.س.س تالاي عايباتتى جىبەردىڭىزدەر. بۇعان قوسا وليمپيادا وتكىزىپ جاتقان فرانتسياعا لاعىنەت قارداي بورادى. ال يماننىڭ تۋعان جەرى – الجير. جارىسقا ۇكىلەپ جىبەرگەن ەلى دە سول – الجير. الجير حالقى تۇگەلگە جۋىق مۇسىلمان. سىزدەر سياقتى ولار دا ناماز وقىپ, شاريعات جولىمەن جۇرەدى. سوندا ولار جىنىسىن اۋىستىرتىپ قويىپ, قول شاپالاقتاپ وتىردى دەيسىزدەر مە?

ادەتتە بىرەۋ فەيك تاراتادى. ونى كوبىنە سارجاعال باسىلىمدار نەمەسە تەك پروپاگاندامەن اينالىساتىن سايتتار ءىلىپ اكەتەدى. وكىنىشتىسى – ءوزىن جۋرناليست, كوۋچ, اقىلمان, تاعى بىردەڭە سانايتىن زامانداستار, اعالار سوعان ەرىپ كەتەدى. ەرىپ قانا قويسا, ونىسىنىڭ قاتە ەكەنىن ءتۇسىنىپ, كەيىن كەشىرىم سۇراسا قۇبا-قۇپ. جوق. ءمىز باقپايدى. ۇيالساڭدار ەدى, دەپ جازدى جۋرناليست.

ايتا كەتەيىك, كەشە يتاليالىق بوكسشى اندجەلا كاريني پاريجدە ءوتىپ جاتقان وليمپيادا ويىندارىنان باس تارتقان. ول بيولوگيالىق جىنىسى ەر ادامەن كەزدەسپەيتىنىن ايتتى.