«يمانداي سەندىك»: بالعىنبەك يماشەۆتىڭ ۇلىنان جولداما ساتىپ العان تاعى 40 شاقتى ادام شۋ شىعاردى

ۆيدەودان سكرين

ايتىسكەر بالعىنبەك يماشەۆتىڭ ۇلىنان قاجىلىققا جولداما ساتىپ الدىق دەگەن تاعى 40 شاقتى ادام شۋ شىعاردى. ەلىمىزدىڭ تۇكپىر-تۇكپىرىنەن كەلگەن ازاماتتار اقشاسىن دا قايتارا الماي ءجۇر, دەپ جازدى qandastar.kz

بۇل تۋرالى Stan.kz اقپارات اگەنتتىگى كتك ارناسىنا سىلتەمە جاساپ حابارلايدى.

بۇگىن الماتىداعى زارداپ شەگۋشىلەر پوليتسيا باسقارماسىنا بارىپ, تەرگەۋدىڭ قالاي ءجۇرىپ جاتقانىن بىلۋگە تىرىستى.

“19 ساۋىردە ۇشۋىم كەرەك ەدى, سول ۋاقىتتان بەرى ەشقايدا ۇشقان جوقپىز. اقشامىز دا قايتارىلماي جاتىر. جۇماعا دەيىن دەگەن, ەڭ سوڭعى ۋادەسى قۇربان ايتقا دەيىن قايتارامىز دەگەن. ديرەكتورى يماشەۆ دانيار دەگەن جىگىت”, – دەيدى بەرىك مارجانوۆ.

ارقايسىسى جولداماعا شامامەن 500 مىڭ تەڭگەدەن تولەگەن. ياعني ايتىسكەردىڭ ۇلى ولارعا جالپى سوماسى 20 ميلليون تەڭگە قارىز دەيدى. ولارعا مەككە مەن ماديناداعى ءۇش جانە ءتورت جۇلدىزدى قوناق ۇيدە تۇرۋ ۋادە ەتىلگەن.

سان سوعىپ قالعاندار كومپانيانى الەۋمەتتىك جەلى ارقىلى تاپقان. بالعىنبەك يماشەۆتىڭ ءوزى جارنامالاعان سوڭ, «يمانداي سەندىك» دەيدى. ال قازىر نە ءوزى, نە ۇلى بايلانىسقا شىقپاي وتىر ەكەن. جۋرناليستەر قوڭىراۋ شالعاندا دا ايتىسكەر سول كۇيى جاۋاپ بەرمەگەن.

ەسكە سالساق, بۇعان دەيىن ءدال وسى كومپانياعا الدانعان 50-گە تارتا ادام جاپپاي پوليتسياعا شاعىم ءتۇسىرىپ, ىلە-شالا دانيار يماشەۆ العان قاراجاتىن قايتارىپ بەرگەن. بۇل جولى دا زارداپ شەككەندەر پوليتسياعا جۇگىنىپ, الاياقتىق دەرەگى بويىنشا قىلمىستىق ءىس قوزعالىپتى.

“قىلمىستىق ءىس جۇرگىزۋ كودەكسىمەن كوزدەلگەن بارلىق تەرگەۋ جۇرگىزىلىپ جاتىر.  ساراپتاما زەرتتەۋلەر تاعايىندالدى. ءىس ماتەريالدارى مىندەتتى تۇردە سوتقا جولدانىلادى”, – دەيدى الماتى قالاسى پوليتسيا دەپارتامەنتىنىڭ رەسمي وكىلى سالتانات ازىربەك.

ەسكە سالساق, وسىعان دەيىن ايتىسكەر اقىن بالعىنبەك يماشەۆتىڭ ۇلى دانيار يماشەۆ الاياقتىق فاكتىسى بويىنشا تەرگەۋگەالىنعان ەدى.