يمانعالي تۋرالى ءتۇرلى اڭگىمە ايتۋعا بولادى, بىراق ول ەكىجۇزدى ەمەس — دوس كوشىم

فوتو: ErtenMedia.kz

تاسماعامبەتوۆتىڭ ساياسي وبرازىنا حالىقتىڭ كوزقاراسى ەكىۇشتى: ءبىرى ونى ءتىپتى «بولاشاق پرەزيدەنت» رەتىندە كورسە, ءبىرى «ەسكى جۇيەنىڭ ادامى» دەپ سانايدى, دەپ جازدى qandastar.kz

وسىنداي اتاۋلى كۇنى ErtenMedia.kz قوعام قايراتكەرى, ساياساتكەر دوس كوشىمنەن يمانعالي تاسماعامبەتوۆ تۋرالى بىرەر اۋىز پىكىر سۇرادى.

دوس كوشىمنىڭ پىكىرىنشە, يمانعالي تاسماعامبەتوۆ — ءوز كەزىندەگى بيلىككە, ءوز كەزىندەگى جۇيەگە قىزمەت ەتكەن ادام.

«ول سول ۋاقىتتاردا سول جۇيەگە بەرىلە قىزمەت ەتتى. جىبەرگەن, جۇمساعان جاقتارىنىڭ بارىندە بارىنشا جاقسى قىزمەت كورسەتۋگە تىرىستى. قاق-سوقپەن ءىسى جوق. قىلمىستىق ىستەرىن ەشكىم ەستىمەگەن. ەڭ باستىسى قازاق حالقىنا دەگەن جاقسى كوزقاراسى بار باسشىلاردىڭ بىرەۋى», — دەيدى دوس كوشىم تاسماعامبەتوۆ تۋرالى.

ساياساتكەر قوعامدا تاسماعامبەتوۆكە قاتىستى جاعىمسىز پىكىر نەلىكتەن قالىپتاسقانىن دا ءتۇسىندىردى.

«يمانعالي تۋرالى اڭگىمە كوپ شىعاتىن سەبەبى: «ەگەر ول جاقسى بولسا, نەلىكتەن اۆتوريتارلىق جۇيەگە قىزمەت ەتتى?» دەگەن ساۋال. ول كەزىندە توتاليتارلىق جۇيەگە دە قىزمەت ەتتى. قازاقستانداعى كومسومولدىڭ باستىعى بولدى. ال كومسومول دەگەنىمىز كوممۋنيستىك پارتيانىڭ ءىنىسى دەيمىز بە, ەكىنشى كەزەكتەگى رەزەرۆى دەپ ايتۋعا بولادى. سوندىقتان ول سول جۇيەگە دە بەرىلىپ قىزمەت ەتتى. ودان كەيىن اۆتوكراتيالىق جۇيەگە 33 جىل بويى قىزمەت ەتتى. بارىنشا, بەرىلە قىزمەت ەتتى. سوندىقتان ادامداردا «ەگەر جاقسى ادام بولسا, نەگە وسى جۇيەگە قارسى شىقپايدى?» دەگەن سۇراق تۋىندايتىن سياقتى», — دەدى دوس كوشىم.

قوعام قايراتكەرى دوس كوشىم تاسماعامبەتوۆتە كەيبىر تانىمال تۇلعالار سياقتى «ەكىجۇزدىلىك جوق» دەگەن پىكىردە.

«ءار ادامنىڭ ءوزىنىڭ تاڭداۋى بار. سول جۇيەدە مىندەتتى تۇردە تەك جامان ادامدار بولادى دەپ ايتا المايمىن. سول جۇيەگە بەرىلە قىزمەت ەتكەن كوپتەگەن ازاماتتى بىلەمىن. قايتا مەن سولاردى سىيلايمىن. سەبەبى كەيبىرەۋلەرى «ەسكى قازاقستاندا جامان بولدى, قازىر جاقسى, مەن قازىر جاڭا قازاقستانمىن» دەگەندى ايتىپ ءجۇر. ءوزى سول ەسكى قازاقستاندا جۇمىس ىستەپ, نازارباەۆتىڭ قاسىندا بولعان ادامدار «سوعان قارسى شىقتىق» سياقتى ماسەلەنى كوتەرىپ ءجۇر. تاسماعامبەتوۆ بيلىكتە قانداي جۇيەدە بولسا دا, سول جۇيەگە (ەسكى جۇيەگە — ەسك.) قىزمەت ەتەتىن كوزقاراسىندا, ۇستانىمىندا قالدى. ەكىجۇزدىلىكتى قابىلداماعان سياقتى. وعان نەنى ايتسا, ونى ايتسىن, «مەن وسى جۇيەنىڭ باعىتىندا قالامىن» دەگەن سياقتى», — دەپ ءتۇسىندىردى ساياساتكەر.

سونداي-اق, دوس كوشىم يمانعالي تاسماعامبەتوۆ تۇڭعىش پرەزيدەنت نازارباەۆ جاساعان تۇلعا ەكەنىن ايتتى.

«تاسماعامبەتوۆتىڭ ەڭ ءبىر اتاقتى ءسوزىنىڭ ءبىرى: «مەن نازارباەۆتىڭ پرودۋكتىسىمىن». بىلايشا ايتقاندا, مەنى نازارباەۆ جاساپ شىعاردى دەگەن ءسوز عوي. ونى بىرەۋلەر مازاق قىلعان سياقتى ايتادى. ءيا, ونى نازارباەۆ جاساپ شىعاردى. سوندىقتان ول سول ۋاقىتتاردا نازارباەۆتىڭ باعىتىمەن ءجۇردى, سودان اجىراعان جوق. «جاڭا قازاقستانمىن» دەپ ۇران سالعانىن ەستىگەن جوقپىن. «ادىلەتتى قازاقستان جاسايمىز» دەگەنىن ەستىگەن جوقپىن. قايتا سونى ايتقان ادامداردان وق بويى جوعارى تۇردى», — دەدى ول.

ساياساتكەر ءوزىنىڭ جەكە كوزقاراسىن دا ءبىلدىرىپ, «بارريكادانىڭ ەكى جاعىندا تۇرساق تا, ونى سىيلايمىن», — دەدى.

«بىراق مەنىڭ ساياسي كوزقاراسىما قارسى ادام. الايدا ونىڭ ادامشىلىعىن, ادامگەرشىلىگىن ەش ۋاقىتتا جوققا شىعارعان جوقپىن. مەن ونىڭ ۇستانىمىن سىيلاۋىم كەرەك. ءيا, ەكەۋمىز بارريكادانىڭ ەكى جاعىندا شىعارمىز. سوندىقتان ادامدارعا وسى ماسەلەنى ءتۇسىنۋ كەرەك. مەنىڭ ويىمشا, ول سول جۇيەگە ولە-ولگەنشە قىزمەت ەتەتىن ادام بولىپ قالادى», — دەپ تۇيىندەدى ساياساتكەر.

تاسماعامبەتوۆ تۋرالى دەرەك

يماناعالي تاسماعامبەتوۆ 68 جاستا. ول نازارباەۆتىڭ كەڭەسشىسى, پرەمەر-مينيستر ورىنباسارى, اتىراۋ وبلىسىنىڭ اكىمى, الماتى قالاسىنىڭ اكىمى, استانا قالاسىنىڭ اكىمى, قورعانىس ءمينيسترى سەكىلدى جاۋاپتى قىزمەتتەردى اتقاردى.

تاسماعامبەتوۆ ءالى كۇنگە دەيىن ساياسي ارەنادان الىستامادى. كەيىنگى جىلدارى ەلشىلىك قىزمەتتەردە دە بولدى. 2017 جىلعى 3 اقپاننان 2019 جىلعى 18 جەلتوقسانعا دەيىن قازاقستاننىڭ رەسەي فەدەراتسياسىنداعى توتەنشە جانە وكىلەتتى ەلشىسى بولدى.

قازىر ول — ۇقشۇ باس حاتشىسى.