ينتەرنەت ارقىلى ەسىرتكى تاراتقان: باتىس قازاقستاندا قىلمىستىق توپ ۇستالدى

باتىس قازاقستان وبلىسىندا ينتەرنەت جەلىسى ارقىلى ەسىرتكى جانە پسيحوتروپتىق زاتتاردى زاڭسىز تاراتۋمەن اينالىسقان ۇيىمداسقان قىلمىستىق توپتىڭ جولى كەسىلدى, دەپ حابارلايدى Qandastar.kz اقپارات پورتالى Polisia.kz-كە سىلتەمە جاساپ.

وبلىستىق پوليتسيا دەپارتامەنتىنىڭ ەسىرتكى قىلمىسىنا قارسى كۇرەس باسقارماسى وزگە دە پوليتسيا بولىمشەلەرىمەن بىرلەسىپ جۇرگىزگەن ارنايى جەدەل-ىزدەستىرۋ ءىس-شارالارى ناتيجەسىندە قىلمىستىق توپتىڭ ارەكەتىن توقتاتتى.

تەرگەۋ بارىسىندا اتالعان توپتىڭ جۇمىسىن الماتى قالاسىنىڭ تۇرعىنى ۇيىمداستىرعانى انىقتالدى. ول ينتەرنەت-دۇكەندەر قۇرۋ ارقىلى باتىس قازاقستان وبلىسى اۋماعىندا ەسىرتكىنى تاراتۋ ارناسىن جولعا قويعان.

جەدەل شارالار ناتيجەسىندە قىلمىستىق توپتىڭ ءتورت بەلسەندى مۇشەسى ۇستالدى. 27 جاستاعى الماتىلىق قالاارالىق كۋرەر رەتىندە ارەكەت ەتكەن. جەكە ءتىنتۋ كەزىندە ونىڭ ۇستىنەن 145 ورالعان ەسىرتكى دوزاسى تاركىلەندى. 25 جاستاعى ورالدىق ازامات «وپەراتور-قويماشى» قىزمەتىن اتقارعان. ونىڭ پاتەرىنەن مەفەدرون, ماريحۋانا, ەلەكتروندى تارازى جانە وراۋ ماتەريالدارى تابىلدى. تاعى ەكى ورالدىق تۇرعىن «ەسىرتكى جاسىرۋشى» رەتىندە تانىلعان. ولاردىڭ قولىنان 100 zip-پاكەتكە سالىنعان دايىن ەسىرتكى تاركىلەندى, — دەلىنگەن حابارلامادا.

توپ ۇيىمداستىرۋشىسىنا قر قك 262-بابى 1-بولىگى بويىنشا (ۇيىمداسقان قىلمىستىق توپتى قۇرۋ جانە باسقارۋ), قالعان قاتىسۋشىلارعا 262-باپتىڭ 2-بولىگى بويىنشا (قىلمىستىق توپ قۇرامىندا ارەكەت ەتۋ) قىلمىستىق ءىس قوزعالدى.

تەرگەۋ بارىسى وبلىستىق پوليتسيا باسشىلىعىنىڭ تىكەلەي باقىلاۋىندا. الدىن الۋ شاراسى ناتيجەسىندە شامامەن 1000 ءبىر رەتتىك دوزانىڭ زاڭسىز اينالىمعا تۇسۋىنە جول بەرىلمەدى.

قازىرگى تاڭدا ۇيىمداسقان توپتىڭ وزگە دە مۇشەلەرىن انىقتاۋ جانە ولاردى جاۋاپكەرشىلىككە تارتۋ باعىتىندا تەرگەۋ امالدارى جالعاسۋدا.