جاڭالىقتار
ينتەرنەتتەگى جازباسى ءۇشىن قازاقستاندىقتار 20 جىلعا دەيىن باس بوستاندىعىنان ايىرىلۋى مۇمكىن
فوتو: URA.RU
قاراعاندى وبلىسىنىڭ پروكۋراتۋراسى الەۋمەتتىك جەلىلەردە ۇلتارالىق ارازدىقتى قوزدىرۋ فاكتىلەرىنىڭ كوبەيگەنىن مالىمدەدى. مۇنداي قۇقىقبۇزۋشىلىقتاردىڭ باسىم بولىگى Instagram, TikTok جانە Threads پلاتفورمالارىندا تىركەلگەن, دەپ حابارلايدى qandastar.kz
وسىعان بايلانىستى پروكۋرورلار ازاماتتارعا قر كونستيتۋتسياسىندا بەكىتىلگەن ۇلتارالىق كەلىسىمگە قاتەر توندىرەتىن كەز كەلگەن ارەكەتكە تىيىم سالىناتىنىن ەسكە سالدى.
زاڭعا سايكەس, مۇنداي قىلمىس جاساعاندار 2 جىلدان 7 جىلعا دەيىن باس بوستاندىعىنان ايرىلۋى مۇمكىن. ال اۋىر زارداپتارعا اكەلگەن جاعدايدا جازا مەرزىمى 12 جىلدان 20 جىلعا دەيىن ۇزارۋى ىقتيمال.
بۇل قىلمىستار ەكسترەميستىك ساناتقا جاتادى جانە امنيستيا قولدانىلمايدى. سونداي-اق جازبا اۆتورىنىڭ كوپشىلىك الدىندا كەشىرىم سۇراۋى دا ونى جاۋاپكەرشىلىكتەن بوساتپايدى.
