«Intım sýretterińdi jarııalaımyn»: Oralda er adam burynǵy súıiktisin 3 jyl boıy bopsalap kelgen

Oral turǵyny úsh jyl boıy burynǵy súıiktisinen aqsha bopsalaǵan, dep habarlaıdy Qandastar.kz.

23 jastaǵy er adam qyzymen ajyrasyp ketken soń, olardyń ortaq ótkenin aqsha tabý kózine aınaldyrǵan.

Osy ýaqyt ishinde jas jigit burynǵy súıiktisin ıntımdik sýretterin jelige jarııalaımyn dep qorqytyp, úsh jyl boıy bopsalaǵan.

Sol arqyly ol qyzdan jalpy somasy 9 mıllıon teńgeden astam aqsha alǵan.

Ony kezekti 150 myń teńge alyp jatqan sátinde ustady.

«Bopsalaý faktileri bank aýdarymdary men messendjerdegi hat almasýlar arqyly dáleldendi. Kúdikti kezekti 150 myń teńgeni alyp jatqan sátinde qolǵa tústi. Atalǵan fakti boıynsha qylmystyq is qozǵaldy, al ustalǵan azamat ýaqytsha ustaý ızolıatoryna qamaýǵa alyndy. Qazirgi ýaqytta tergeý amaldary júrgizilýde, tergeý barysy departament basshylyǵynyń baqylaýynda», – dep habarlady Polıııa departamenti.

Sondaı-aq vedomstvo kez kelgen bopsalaý faktisi oryn alǵan jaǵdaıda quqyq qorǵaý organdaryna dereý júginý qajettigin eske saldy. Qylmyskerlerdiń talabyna kónbeý kerek jáne máseleni óz betinshe sheshýge tyrysýdyń qajeti joq – bul jaǵdaıdy odan ári ýshyqtyrýy múmkin.