جاڭالىقتار
ء«ينتيمدى ءمان-جايلار بار»: ساكەن ماماشتىڭ ايەلى سوتتىڭ اشىق وتۋىنە قارسى
استانادا قازاقستاننىڭ بىرىككەن اراب امىرلىكتەرىندەگى ەلشىلىگىنىڭ بۇرىنعى كەڭەسشىسى ساكەن ماماشقا قاتىستى سوت پروتسەسى باستالدى, دەپ حابارلايدى Qandastar.kz اقپارات پورتالى. جابىرلەنۋشى, ديپلوماتتىڭ ايەلى كارينا ماماش سوت پروتسەسىن جابىق رەجيمدە وتكىزۋدى سۇرادى.
– مەنىڭ جەكە ءومىرىم ەگجەي-تەگجەيلى جاريا بولعانىن قالامايمىن. ەكى بالامىز بار, ولاردىڭ پسيحولوگياسىنا الاڭدايمىن, – دەدى جابىرلەنۋشى كارينا ماماش.
ايپتالۋشىنى سوت زالىنا كونۆوي قىزمەتكەرلەرى الىپ كەلدى. سوت وتىرىسىنا جابىرلەنۋشى رەتىندە ونىڭ جۇبايى كارينا ماماش كەلىپ, قارا ءتۇستى, ۇلكەن كۇننەن قورعايتىن كوزىلدىرىك تاعىپ العان.
مەملەكەتتىك ايىپتاۋشى جاڭگىر سادۆاكاسوۆ سوتتىڭ اشىق تۇردە وتۋىنە قارسىلىق بىلدىرمەدى. الايدا جابىرلەنۋشى تاراپتىڭ وكىلدەرى مەن كارينا ماماش پروتسەسستى جابىق وتكىزۋ تۋرالى ءوتىنىش ءبىلدىردى. ول ينتيمدىك سيپاتتاعى مالىمەتتەردىڭ جاريا بولۋىن قالامايتىنىن جەتكىزدى.
ءوز كەزەگىندە ايىپتالۋشى ساكەن ماماش سوتتىڭ اشىق ءوتۋىن قولدايتىنىن ايتتى. ونىڭ سوزىنشە, بۇل ءىس بويىنشا جاسىرىن ەشتەڭە جوق.
ماسەلەنى تىڭداعان استانا قالاسى بويىنشا قىلمىستىق ىستەر جونىندەگى مامانداندىرىلعان اۋدانارالىق سوتىنىڭ سۋدياسى ارتۋر ابدىحانوۆ پروتسەسستى جابىق تۇردە وتكىزۋ تۋرالى شەشىم قابىلدادى. سونىمەن قاتار, سوت پروتسەسىندە تەك ساكەن ماماشتان باسقا قاتىسۋشىلاردى بەينە جانە فوتوتۇسىرىلىمگە تۇسىرۋگە رۇقسات بەرىلدى. ايتا كەتەيىك, ۇكىم جاريا تۇردە وقىلادى.
