يپوتەكا مەن نەسيە الۋ قيىنداۋى مۇمكىن

فوتو: اشىق دەرەككوز

قازاقستاندىقتار ءۇشىن 2026 جىلدان باستاپ نەسيە جانە يپوتەكا الۋ پروتسەسى كۇردەلەنە ءتۇسۋى مۇمكىن, دەپ حابارلايدى qandastar.kz

قارجى نارىعىن رەتتەۋ جانە دامىتۋ اگەنتتىگى قازىرگى ۋاقىتتا وسىعان قاتىستى زاڭ جوباسىن ازىرلەپ جاتىر. جاڭا تالاپتار بويىنشا, قازاقستاندىقتار يپوتەكا نەمەسە كرەديت الۋ ءۇشىن بانككە جۇگىنەر الدىندا بىرنەشە ماڭىزدى كريتەريگە سايكەس كەلۋى ءتيىس.

ەندى ەگەر ءسىز ءۇي الۋدى نەمەسە كولىك ساتىپ الۋدى جوسپارلاپ وتىرساڭىز, بانكتەردىڭ قاتاڭ تالاپتارىنا دايىن بولۋ كەرەك. ەگەر تومەندە اتالعان شارتتاردىڭ بىرىنە ساي كەلمەسەڭىز, ءسىز «تاۋەكەلى جوعارى» نەمەسە قىزىل توپقا جاتقىزىلاسىز, بۇل دەگەنىمىز – نەسيە الۋ مۇمكىندىگى ايتارلىقتاي تومەندەيدى. اتاپ ايتقاندا, ەگەر:

• كرەديتتىك تاريحىڭىز 3 جىلدان از بولسا; • سوڭعى 12 اي ىشىندە نەسيە تولەمدەرىڭىز 30 كۇننەن استام ۋاقىتقا كەشىكتىرىلگەن نەمەسە 3 اەك (11796 تەڭگە) جانە ودان كوپ سوماعا كەشىگۋ بولعان بولسا; • ءبىر مەزەتتە 3 نەمەسە ودان كوپ قارجى ۇيىمىنان نەسيە العان بولساڭىز; • قارىز جۇكتەمەسى ايلىق تابىسىڭىزدىڭ 45%-ىنان كوپ بولسا; • كىرىسىڭىزدى راستاي المايتىن بولساڭىز (مىسالى, بەيرەسمي جۇمىس ىستەيتىندەر ءۇشىن); • كرەديتتىك تاريحىڭىز تەرىس بولعان جاعدايدا, سىزگە نەسيە بەرىلمەۋى مۇمكىن.

ەگەر ءسىز «جوعارى تاۋەكەلدى» دەپ تانىلساڭىز, بانك نەسيە بەرمەس بۇرىن دەفولت تاۋەكەلىن ەسەپتەيدى, ياعني قارىزدى قايتارۋ ىقتيمالدىعى قانشالىقتى جوعارى ەكەنىن باعالايدى. ەگەر دەفولت تاۋەكەلىنىڭ ىقتيمالدىعى 5%-دان جوعارى بولسا, بانك ءسىزدى قاتاڭ باقىلاۋعا الۋى قاجەت بولادى.

بۇل جاڭا تالاپتار قازاقستاندىقتار ءۇشىن كەلەسى وزگەرىستەردى بىلدىرەدى: • بەيرەسمي جۇمىس ىستەيتىندەر نەمەسە تابىسىن راستاي المايتىندار ءۇشىن نەسيە الۋ قيىن بولادى; • ەگەر تولەمدەرىڭىزدى بىرنەشە كۇن كەشىكتىرسەڭىز, بۇل كەلەسى جولى نەسيە الۋىڭىزدى قيىنداتۋى مۇمكىن; • بىرنەشە بانكتەن نەسيە العاندار دا تاۋەكەل توبىنا ەنۋى مۇمكىن; • بانك سىزگە نەسيە بەرگەننەن كەيىن, تۇراقتى باقىلاۋ جۇرگىزۋى مۇمكىن, بۇل بولاشاقتا جاڭا نەسيە الۋعا كەدەرگى كەلتىرۋى ىقتيمال; • بانكتەر سالىق دەكلاراتسيالارىن تەكسەرىپ, بۋحگالتەرلىك جانە سالىق ەسەپتەرىندەگى سايكەسسىزدىكتەردى انىقتايدى. ەگەر نەگىزگى قارجىلىق كورسەتكىشتەر اراسىنداعى ايىرماشىلىق 30%-دان اسسا, بۇل دا ەسكەرىلەتىن بولادى.

بۇل وزگەرىستەر, ارينە, يپوتەكا الۋ ۇدەرىسىن اشىق ەتەدى, بىراق ءبىر ۋاقىتتا قاعازباستىلىقتى كوبەيتەدى. بانكتەردىڭ تاۋەكەلدەردى ازايتۋعا باعىتتالعان ارەكەتتەرى جاڭا باستاعان كاسىپكەرلەر, ءوزىن-ءوزى جۇمىسپەن قامتىعاندار جانە تابىسىن دالەلدەي المايتىن ادامدار ءۇشىن قيىندىق تۋعىزۋى مۇمكىن.