يران يادرولىق باعدارلاماعا قاتىستى «ەۋروۇشتىكپەن» كەلىسسوز جۇرگىزۋگە كەلىستى

يران, ۇلىبريتانيا, فرانتسيا جانە گەرمانيا 25 شىلدە كۇنى ىستامبۇلدا يراننىڭ يادرولىق باعدارلاماسىنا قاتىستى كەلىسسوزدەر وتكىزەدى, دەپ جازدى Qandastar.kz.

Stan.kz اقپارات اگەنتتىگى حابارلاعانداي, بۇعان دەيىن ءۇش ەۋروپالىق مەملەكەت تەگەرانعا كەلىسسوزدەردى قايتا باستاماسا, يرانعا قارسى حالىقارالىق سانكتسيالار قايتا ەنگىزىلەتىنىن ەسكەرتكەن ەدى.

بۇعان دەيىن ۇلىبريتانيا, فرانتسيا, گەرمانيانىڭ سىرتقى ىستەر مينيسترلەرى جانە ەۋروپالىق وداقتىڭ سىرتقى ساياسات جانە قاۋىپسىزدىك جونىندەگى جوعارعى وكىلى يراننىڭ سىرتقى ىستەر ءمينيسترى ابباس اراكچيمەن تەلەفون ارقىلى سويلەسكەن.

2015 جىلى جاسالعان يادرولىق كەلىسىمنىڭ قالعان قاتىسۋشىلارى – ءۇش ەۋروپالىق ەل, ياعني, ۇلىبريتانيا, فرانتسيا, گەرمانيا, سونداي-اق قىتاي مەن رەسەي. بۇل كەلىسىمگە سايكەس, يران ءوز يادرولىق باعدارلاماسىنا شەكتەۋلەر ەنگىزۋ ەسەبىنەن, وعان سالىنعان سانكتسيالاردان بوساتىلعان ەدى. الايدا اقش 2018 جىلى بۇل قۇرامنان شىعىپ كەتتى.

ەۋروۇشتىك ەگەر يران مەن اقش اراسىنداعى, يزرايل مەن يران اراسىنداعى اۋە سوعىسىنا دەيىن جۇرگىزىلگەن يادرولىق كەلىسسوزدەر قايتا جاندانباسا نەمەسە ايتارلىقتاي ناتيجە بەرمەسە, وندا بۇۇ سانكتسيالارىن “قايتارۋ مەحانيزمى” ارقىلى تامىز ايىنىڭ سوڭىنا دەيىن قايتا ەنگىزەتىنىن مالىمدەدى.

“ەگەر ەو نەمەسە ەۋروۇشتىك ءوز ءرولىن اتقارعىسى كەلسە, ولار جاۋاپكەرشىلىكپەن ارەكەت ەتىپ, قوقان-لوقى مەن قىسىم كورسەتۋ ساياساتىنان, ونىڭ ىشىندە “قايتارىمدى شارالاردان” باس تارتۋى كەرەك. ويتكەنى بۇل ارەكەتتەردىڭ ەشقانداي مورالدىق تا, زاڭدىق تا نەگىزى جوق», — دەپ جاۋاپ بەردى اراكچي.

يزرايل مەن يران اراسىنداعى سوعىس باستالعانعا دەيىن تەگەران مەن ۆاشينگتون وماننىڭ دەلدالدىعىمەن بەس راۋندتىق يادرولىق كەلىسسوز جۇرگىزگەن ەدى. الايدا ولار بىرقاتار كەدەرگىلەرگە تاپ بولدى. سونىڭ ءبىرى — يرانداعى ۋراندى بايىتۋ ءىسى. باتىس دەرجاۆالارى بۇل پروتسەستى مۇلدە توقتاتۋدى تالاپ ەتىپ وتىر, سەبەبى بۇل يراننىڭ يادرولىق قارۋ جاساپ شىعارۋ قاۋپىن مەيلىنشە ازايتۋعا باعىتتالعان.