جاڭالىقتار
يرانداعى قازاق قىزى قازاقستاندا تۋعان ەلىندەگىدەي سەزىنبەيتىنىن ايتتى
فوتو: اشىق دەرەككوز
يراندا تۋىپ, سوندا وسكەن قانداسىمىز قازاق جۇرتىنا وكپەلى ەكەنىن ايتىپ, مۇڭىن شاقتى. بۇل تۋرالى ول تەمىرلان مۇقاشەۆتىڭ “يران قازاقتارى” باعدارلاماسىندا ايتتى, دەپ حابارلايدى qandastar.kz
قانداسىمىزدىڭ ايتۋىنشا, ول ءوزىن نە قازاقستاندا, نە يراندا قازاق رەتىندە سەزىنە الماعان.
“باستى پروبلەما — سەن ءوزىڭدى ەشقايدا جاتپايتىن ادام سياقتى سەزىنەسىڭ. ويتكەنى, كەلبەتىڭە بايلانىستى يرانداعى بەت-الپەتىڭ, ءوزىڭدى پارسى حالقىنىڭ ءبىر بولىگى ەمەس سياقتى سەزىنەسىڭ. بۇل سەزىم قازاقستانعا بارعاندا جوعالادى ما دەپ ويلادىم. ول جاققا ەكى رەت بارعانمىن. بىراق قازاقستانعا بارعاندا دا ءوزىڭدى قازاق رەتىندە سەزىنبەيسىڭ. ويتكەنى قازاقتاردىڭ كوبى ورىسشا سويلەيدى جانە ولاردى تۇسىنبەيسىڭ. وسىلايشا تەرەڭ تۇپكى ساناڭدا ءوزىڭدى ەشبىر جەرگە جاتپايتىن ادام رەتىندە سەزىنەسىڭ. سوندا سەن نە يراندىق قازاق, نە كادىمگى قازاق ەمەسسىڭ. ەشبىر جەرگە تيەسىلى ەمەسسىڭ. كىشكەنتايىمدا اتامنىڭ اكە-شەشەسىن جەك كورەتىنمىن. ويتكەنى ولار وسىندا كوشىپ كەلگەن. بىلەسىڭ بە, يران قازاعى بولىپ تۋىلۋىمنىڭ ىقتيمالدىعى سونشالىقتى تومەن… وسىدان ويلايمىن, نەگە مەن…? نەگە مەن يراندا تۋىلۋىم كەرەك بولدىم? يران قازاعى بولىپ تۋىلۋدىڭ ىقتيمالدىعى سونشالىقتى تومەن… شامامەن 0.00001%. بۇل مەنىڭ جىنىما تيەدى. ۇنەمى وزىمە سۇراق قويامىن. نەگە مەن? نەگە ءبىز يراندا تۋىلدىق? نەگە ءبىز باسقالاردان ەرەكشەمىز?”, — دەيدى ول كوزىنە جاس الىپ.
پىكىر جازعان جەلى قولدانۋشىلارىنىڭ سوزىنە سەنسەك, بۇنداي سەزىم تاريحي وتانىنان بولەك جەردە تۋىپ-وسكەن بارلىق ادامدا بولادى.
”بۇل — راس, شەتتە تۋعان قازاقتار ەلگە كەلگەنىمەن, وزدەرىن تولىق قازاق سەزىنە المايدى”, “قارىنداسىم, سەن تۇگىلى وسىندا تۋعان ءبىز دە ءوزىمىزدى قازاق سەزىنبەيمىز”, “مەن دە وزبەكستاننان كوشىپ كەلگەندە شىنىمەن قازاقستانعا كەلدىم بە دەپ تاڭ قالدىم, ءبارى ورىسشا سويلەيتىن”, “وتە دۇرىس ايتادى, اتامەكەن دەپ ىزدەپ كەلەسىڭ, بىراق ءوز ۇلتىڭنىڭ ادامدارىمەن تۇسىنىسە المايسىڭ”, — دەپ جازدى ولار.
