يراننان كوشىرىلگەن قانداستار سولتۇستىك قازاقستان وبلىسىنا قونىستاندى

پەتروپاۆلدان 90 شاقىرىم جەردەگى پەتروۆكا اۋىلىنا 4 وتباسى – بارلىعى 13 ادام كوشىپ كەلدى.

– بالالار مەكتەپ پەن ۋنيۆەرسيتەتتە يرانشا وقىعان. ءبارى جۇمىستا. ءبىز ءوزىمىز ساۋدا جاساپ جۇردىك. جاعدايىمىز جامان ەمەس, جاقسى. قۇدايعا شۇكىر, ول جەردە دە جاقسى ەدى. بۇل جەردە دا جاقسى بولادى دەپ ويلايمىز ەندى, – دەدى قازاقستانعا كوشىپ كەلگەن قانداس ميۋا ءبالي.

120 شاقىرىم جەردەگى نيكولاەۆكا اۋىلىندا «ەڭبەك» باعدارلاماسىنا قاتىسۋشىلارعا 30 ءۇي سالىنعان. ەندى سول ۇيلەرگە 10 ەتنيكالىق وتباسى قونىستانادى. قالعانى شال اقىن اۋدانى سەرگەەۆكاعا ورنالاستىرىلدى.

– تاعى ەكىنشى تولقىن كەلەدى. ناعىز قايماقتارى, زيالى توپ كەلەدى دەپ ويلايمىن. قازىرگى كەزدە بىزگە ءبىر دارىگەر, مەحانيك, ەكسكاۆاتورششيك, دانەكەرلەۋشى, تىگىنشى كەلدى. مۇندا ولار ءوزى ءىسىن اشادى, ۇلتتىق كيىم تىگەدى, كىلەم توقيدى. 20 جۇمىس ورنى اشىلادى. سوندا ىستەيدى, – دەدى دۇنيەجۇزى قازاقتارى قاۋىمداستىعىنىڭ سولتۇستىك قازاقستانداعى ءبولىمىنىڭ جەتەكشىسى ارمان سۇيىندىكوۆ.

ونىڭ ايتۋىنشا, قانداستارعا قازاق ءتىلىن ۇيرەنۋگە كومەك كورسەتىلەدى. ول ءۇشىن اپتاسىنا ءۇش رەت تەگىن ساباقتار ۇيىمداستىرىلادى.

قىركۇيەكتىڭ ورتاسىندا قازاقستانعا يراننان 53 قانداس كوشىرىلىپ اكەلگەنى حابارلانعان. ولاردىڭ 25-ءى – بالا.

رەسمي مالىمەت بويىنشا, قازاقستاندا جىل باسىنان بەرى 12 501 ادام تاريحي وتانىنا ورالىپ, قانداس مارتەبەسىن العان. 1991 جىلدان بەرى ەلگە 1 ملن. 82,8 مىڭ ەتنيكالىق قازاق ورالعان.

جىل باسىنان بەرى سقو-عا رەسەي مەن وزبەكستاننان 40-قا جۋىق وتباسى كوشىپ كەلگەن.