Jańalyqtar
Irannan kóshirilgen qandastar Soltústik Qazaqstan oblysyna qonystandy
Jaqynda Irannan Qazaqstanǵa kóshirilgen 20 otbasy Soltústik Qazaqstan oblysyna keldi. Olar 21 qyrkúıekte úsh eldi meken atap aıtqanda, Esil aýdanyndaǵy Petrovka men Nıkolaevka jáne Shal aqyn aýdanyndaǵy Sergeevka aýyldaryna qonystandyryldy.
Petropavldan 90 shaqyrym jerdegi Petrovka aýylyna 4 otbasy – barlyǵy 13 adam kóship keldi.
– Balalar mektep pen ýnıversıtette ıransha oqyǵan. Bári jumysta. Biz ózimiz saýda jasap júrdik. Jaǵdaıymyz jaman emes, jaqsy. Qudaıǵa shúkir, ol jerde de jaqsy edi. Bul jerde da jaqsy bolady dep oılaımyz endi, – dedi Qazaqstanǵa kóship kelgen qandas Mıýa Bálı.
120 shaqyrym jerdegi Nıkolaevka aýylynda «Eńbek» baǵdarlamasyna qatysýshylarǵa 30 úı salynǵan. Endi sol úılerge 10 etnıkalyq otbasy qonystanady. Qalǵany Shal aqyn aýdany Sergeevkaǵa ornalastyryldy.
– Taǵy ekinshi tolqyn keledi. Naǵyz qaımaqtary, zııaly top keledi dep oılaımyn. Qazirgi kezde bizge bir dáriger, mehanık, ekskavatorщık, dánekerleýshi, tiginshi keldi. Munda olar ózi isin ashady, ulttyq kıim tigedi, kilem toqıdy. 20 jumys orny ashylady. Sonda isteıdi, – dedi Dúnıejúzi qazaqtary qaýymdastyǵynyń Soltústik Qazaqstandaǵy bóliminiń jetekshisi Arman Súıindikov.
Onyń aıtýynsha, qandastarǵa qazaq tilin úırenýge kómek kórsetiledi. Ol úshin aptasyna úsh ret tegin sabaqtar uıymdastyrylady.
Qyrkúıektiń ortasynda Qazaqstanǵa Irannan 53 qandas kóshirilip ákelgeni habarlanǵan. Olardyń 25-i – bala.
Resmı málimet boıynsha, Qazaqstanda jyl basynan beri 12 501 adam tarıhı otanyna oralyp, qandas mártebesin alǵan. 1991 jyldan beri elge 1 mln. 82,8 myń etnıkalyq qazaq oralǵan.
Jyl basynan beri SQO-ǵa Reseı men О́zbekstannan 40-qa jýyq otbasy kóship kelgen.
