«Irgetasy qulap, tereze jarylǵan»: Aqtóbe oblysynda 30 jyl buryn salynǵan balabaqsha apatty jaǵdaıda tur

Foto: Vıdeodan skrın

Aqtóbe oblysy Tamdy aýylynyń turǵyndary memlekettik balabaqshany apatty dep tanýdy suraıdy. Otyz alty jyl buryn salynǵan ǵımarattyń qabyrǵasy jarylyp, irgetasy qulaı bastaǵan, dep jazdy qandastar.kz

 Bul týraly Stan.kz aqparat agenttigi 31-arnanyń “Informbıýro” baǵdarlamasyna silteme jasap habarlaıdy.

Ul-qyzdarynyń qaýipsizdigine alańdaǵan jurt toz-tozy shyqqan bóbekjaı qırap, tóbesi opyrylyp túse me dep alańdaıdy. Olar bala sany jyl saıyn kóbeıip jatqan eldimekenge jańa bilim uıasyn salatyn ýaqyt jetti dep otyr.

Ǵımarat áý basta aýyldyq keńestiń keńsesi, sosyn ákimdik bolǵan. Bertin kele balabaqshaǵa aınalǵan. Biraq turǵyndar eki qabatty nysan salynǵaly jóndeý jqmysyn kórmegen.

“Birinshiden, astynyń irgetasy qulap jatyr, shashylyp jatyr. Jóndeý kerek. Terezeniń bári jarylyp jatyr, aǵash terezeler burynǵy. Bul 1989-shy jyly salynǵan balabaqsha. Sodan beri jóndeý kórmegen. Jyl saıyn qyzdar jóndeý jumysyn ótkizip turady sylap, aqtap”, – deıdi Tamdy aýylynyń turǵyny Marat Mahambetov.

Syz tarqan bólmeler kúz ben qysta azynap turady. Sondyqtan balalarymyzdyń bóbekjaıǵa barǵanynan góri aýrýhana tabaldyryǵyn tozdyratyn kúnderi kóbeıdi deıdi ata-analar.

“Bir balam emes, eki balam keledi osy balabaqshada. Balam jıi aýyrady. Qyzym birinshi ret bardy birneshe aýrýhanaǵa jatyp shyqtyq. Balalar degen bronh bolyp shyǵady, shyny kerek. Ǵımarat beton, qysta muzdaı, jazda ystyq. Túski ýaqytta apaılardyń ózi habarlasady. “Balańyz jótelip jatpaı jatyr qaqyldap” dep alyp ketemin amal joq”, – deıdi aýyl turǵyny.

Halyq qabyrǵasy shógip, irgetasy syr bergen ǵımaratty sheneýnikter jóndeýge asyqpaıdy. Olar balabaqshany jóndeý úshin smetalyq qujat daıyndalǵanyn aıtady. Tipti ǵımaratqa qosymsha qurylys salý kózdelgen eken.

“Bul ǵımaratqa qosymsha qurylys jasaý kerek bolyp tur. Sol qurylysty jasaı otyryp, kúrdeli jóndeý júrgiziledi dep túsindirildi ata-analarǵa. Endi qazir barlyq qujattardy bilim basqarmasyna tapsyrdyq. 2025-shi jyldyń basynda bıýdjet bekitilip bolǵannan keıin bul obekt 2025 jyldyń ishine kirilmeı tur. Biraq 2026 jyldyń tiziliminde tur”, – dep málimdedi Alǵa aýdandyq bilim bólimi basshysynyń mindetin atqarýshy Gúlshat Búrkitalına.

Bilim bólimindegiler qazynadan qarjy bólinse nysan kelesi jyly jóndeledi dep sendirdi. Tamdy aýylyndaǵy jalǵyz mektepke deıingi bilim berý mekemesinde qazir 50-den astam bala tárbıelenedi.