ء«ىس ەندى قابىلدانعان»: قارجى مونيتورينگى اگەنتتىگى نۇرلان نىعماتۋليننىڭ ۇلىنا قاتىستى ارىزدى قاراپ جاتىر

فوتو: بايتەرەك حولدينگ

الماتى قالالىق ەكونوميكالىق تەرگەۋ دەپارتامەنتى كورپوراتيۆتىك رەيدەرلىك فاكتى بويىنشا سوتقا دەيىنگى تەرگەۋ امالدارىن جۇرگىزىپ جاتىر, دەپ جازدى qandastar.kz

بۇل تۋرالى Stan.kz اقپارات اگەنتتىگى حابارلايدى.

ءساۋىر ايىنىڭ باسىندا الەۋمەتتىك جەلىلەردە «بايتەرەك» حولدينگى مەن «قازمۇنايگاز-اەرو» جشس-ءنىڭ بۇرىنعى ديرەكتورى نۇرجان نۇرلانوۆقا قاتىستى قىلمىستىق ءىس قوزعالعانى تۋرالى اقپارات تارادى.

ىشكى ىستەر مينيسترلىگى ءىس قىلمىستىق كودەكستىڭ 389-بابى (وزىنشە بيلىك ەتۋ) بويىنشا تەرگەلىپ جاتقانىن حابارلادى. بىراق ىسكە قاتىسى بارلاردىڭ اتى-ءجونى جاريالانبادى.

كەيىن باس پروكۋروردىڭ ورىنباسارى عالىمجان قويگەلديەۆ پارلامەنت ءماجىلىسىنىڭ بۇرىنعى سپيكەرى نۇرلان نىعماتۋليننىڭ ۇلىنا قاتىستى ارىزدار تۇسكەنىن حابارلادى. سونداي-اق ءىستىڭ قارالىپ جاتقانىن جەتكىزدى. بىر كۇن بۇرىن ءىستىڭ الماتى قالاسى بويىنشا ەكونوميكالىق تەرگەۋ دەپارتامەنتىنە تاپسىرىلعانى بەلگىلى بولدى.

“الماتى قالاسى بويىنشا ەكونوميكالىق تەرگەۋ دەپارتامەنتى بۇرىن الماتى پوليتسيا دەپارتامەنتىندە تىركەلگەن رەيدەرلىك فاكتى بويىنشا سوتقا دەيىنگى تەرگەۋ جۇرگىزىپ جاتىر”, – دەلىنگەن قارجى مونيتورينگى اگەنتتىگىنىڭ حابارلاماسىندا.

قازىر بۇل ىسكە قاتىستى كۇدىكتىلەر مەن باسقا دا تۇلعالاردىڭ رەسمي تۇردە انىقتالماعانى كورسەتىلگەن. ءىس ءبىر كۇن بۇرىن, 15 ساۋىردە قاراۋعا قابىلدانعان.

ەسكە سالايىق, بۇعان دەيىن وتاندىق كاسىپكەر قانات امىركين نۇرلان نىعماتۋليننىڭ ۇلكەن ۇلى نۇرجان نۇرلانوۆ وزىنەن «الاتاۋدورستروي» كومپانياسىن تارتىپ الىپ, ودان ۇلكەن سومادا اقشا تالاپ ەتكەنىن ايتقان ەدى. ءسويتىپ نۇرجان نۇرلانوۆتىڭ ۇستىنەن قىلمىستىق ءىس قوزعالعان. دەگەنمەن كەيىننەن ونىڭ رەيدەرلىككە قاتىسى بار كۇدىكتى رەتىندە تانىلماعانى ايتىلدى.