ىشىندە قازاقستاندىقتار بار: رەسەي ميگرانتتاردىڭ ارميادا قىزمەت ەتۋ مەرزىمىن ۇزارتپاق

فوتو: inbusiness.kz

قازىرگى ۋاقىتتا رەسەي جاسى 18 بەن 30 ارالىعىنداعى ازاماتتاردى اسكەرگە شاقىرادى. 2023 جىلدىڭ قاڭتار-قازان ايلارىندا 318 مىڭنان استام شەتەلدىك رەسەي ازاماتتىعىن العان. ولاردىڭ كوپشىلىگى – تاجىكستان, ارمەنيا, قازاقستان, قىرعىزستان, وزبەكستان جانە ءازىربايجاننان كەلگەندەر. دەگەنمەن, سوعىس باستالعالى رەسەي تولقۇجاتىنا دەگەن سۇرانىس پوستكەڭەستىك ەكى مەملەكەت – تاجىكستان مەن قىرعىزستان ازاماتتارى تاراپىنان عانا ارتقان, – دەپ حابارلايدى qandastar.kz atamekenbusiness_qaz تەلەگرام ارناسىنا سىلتەمە جاساپ. 

كورشى ەل 2022 جىلدىڭ كۇزىنەن باستاپ سوعىسقا ميگرانتتاردى بەلسەندى تۇردە تارتۋدا. باستاپقىدا ونىمەن «كومپانياعا قاراۋىل كەرەك» دەگەن جەلەۋمەن «ۆاگنەر» اينالىسقان. كەيىن تەلەفون سوققانداردىڭ ءبىرازى مايدانعا اتتانعانى بەلگىلى بولدى.

ەندى مەملەكەتتىك دۋما ازاماتتىق العان ادامداردىڭ رەسەي ارمياسىندا قىزمەت ەتۋ مەرزىمىن ەكى جىلعا دەيىن ۇلعايتۋدى ۇسىندى. ميگرانتتار ءۇشىن اسكەرگە شاقىرۋ جاسىن 45 نەمەسە 50 جاسقا دەيىن كوتەرۋ دە كوزدەلگەن. سول ءۇشىن تولقۇجات الۋ كەزىندە بىردەن اسكەرگە تىركەۋ باستالادى. قولدانىستاعى زاڭعا 5 تامىزعا دەيىن وزگەرتۋ ەنگىزۋ جوسپارلانعان.