«ىشىنە جىن كىرگەن»: تۇركىستاندا بالالارىن قىلقىندىرىپ ولتىرگەن مۇعالىمگە ۇكىم شىقتى

31 جاستاعى بوتا حاميتقىزى سوت بارىسىندا ءوز كىناسىن مويىنداعان. جانە ءجارىسسوز كەزىندە جازاسىن جەڭىلدەتۋدى سۇراپتى,-دەپ حابارلايدى Qandastar.kz

ء“ىس بويىنشا سوتتالۋشىنىڭ جەڭىلدەتەتىن ءمان-جايلارى ونىڭ بۇرىن سوتتى بولماعانىن سوت ەسكەردى. ودان بولەك ءىس بويىنشا قىلمىستىق ءىس-ارەكەتىن اۋىرلاتاتىن ءمان-جايلاردى انىقتاعان جوقپىز” دەيدى پروكۋرور ايگۇل بەكمىرزاەۆا.

باستاۋىش سىنىپ مۇعالىمىنىڭ قىلمىسقا بارۋ ءموتيۆى كۇيەۋىمەن بولعان جانجال دەيدى سۋديا. 15 كۇن باسقا قالادا جۇمىس ىستەپ, 15 كۇن دەمالاتىن حاميتقىزىنىڭ جولداسى ۇيىنە مۇلدە كەلمەگەسىن ارادا جانجال تۋعان ەكەن. حابارلاماداعى بۇل سوزدەر قىلمىستىق ىستە تىركەلگەن. وسىلاي دەگەن داۋرەن ماداليەۆ سوتتالۋشى قىلمىستى الدىن الا جوسپارلاپ جاساعانىن ايتادى.

“بوتا حاميتقىزى قىلمىستى الدىن الا جوسپارلاپ جاساعان. الدىمەن 4 جاسار قىزىن, سوسىن 2 جاسار ۇلىن تۇنشىقتىرىپ ولتىرگەن كەلىنشەك سوڭىندا باستاپقى سوزىنەن اينىپ كەتتى.

ەسىندە ەشتەڭە قالماعانىن ايتىپ, جاۋاپقا سەلقوس قاراعان ايەل سوتى القابيلەر قاتىسۋىمەن ءوتتى. جانە ولار جازا مەرزىمىنىڭ 15 جىل بولۋىنا داۋىس بەردى” – دەيدى تۇركىستان وبلىستىق قىلمىستىق ىستەپ جونىندەگى اۋدانارالىق سوتىنىڭ سۋدياسى داۋرەن ماداليەۆ.

بوتا حاميتقىزىنىڭ ادۆوكاتى سوتتالۋشىنىڭ پسيحيكالىق اۋىتقۋى بارىنا سەنىمدى. قازاقشالاپ ايتقاندا “ىشىنە جىن كىرگەن” دەگەن زاڭگەر مۇعالىمنىڭ بەرگەن جاۋاپتارى ءسات سايىن قۇبىلىپ وتىرعانىن ايتادى. جانە بۇعان دەيىن ءبىر ايعا ۇيىنەن شىعىپ كەتەتىن كەزدەرى دە بولعان ەكەن.

ء“وز جاۋابىندا قورعاۋىمداعى ازامات قۇلاعىنا بىرەۋلەردىڭ ء“ول, ءولتىر” دەپ سىبىرلاعانىن ايتتى. جانە كوزىنە ۇنەمى ەلەس كورىنەتىنىن جەتكىزدى. بالالارى دا قۇبىجىق بولىپ ەلەستەگەن دەيدى. ءبىز ۇكىممەن كەلىسپەيمىز. اپەللياتسياعا بەرەمىز” –دەيدى ايناگۇل رۇستەموۆا.

سوتتاعى پسيحيكالىق ساراپتاما 31 جاستاعى كەلىنشەكتىڭ اقىل-ەسى دۇرىس دەگەن شەشىمگە كەلگەن. جانە قىلمىستى جاساعان ۋاقىتىندا دا ەشقانداي اففەكت جاعدايىندا بولماپتى. ايتا كەتەيىك, جۋىردا كامەلەت جاسىنا تولماعانداردى ولتىرگەن قىلمىسكەرلەر 20 جىلدان ءومىر بويىنا دەيىن باس بوستاندىعىنان ايىرىلادى دەگەن زاڭ كۇشىنە ەنگەن. بىراق بۇل وزگەرىس تۇركىستانداعى جانتۇرشىگەرلىك قىلمىستان كەيىن ەنگىزىلدى. سوندىقتان ەكى بالاسىن تۇنشىقتىرىپ ولتىرگەن قىزىلوردالىق كەلىنشەككە مۇنداي اۋىر جازا بەرىلگەن جوق.