ىشكى ىستەر مينيسترلىگى ەسكورت قىزمەتىن ۇسىناتىن Kyzdar.net سايتىنىڭ نەلىكتەن جابىلماعانىن ءتۇسىندىردى

فوتو: اشىق دەرەككوز

ىشكى ىستەر مينيسترلىگى ەسكورت قىزمەتىن ۇسىناتىن Kyzdar.net سايتىنىڭ نەلىكتەن جابىلماعانىنا قاتىستى سۇراققا جاۋاپ بەردى. بۇل تۋرالى Stan.kz اقپارات اگەنتتىگى حابارلايدى.

مينيسترلىك مالىمەتىنشە, «بۇقارالىق اقپارات قۇرالدارى تۋرالى» زاڭعا سايكەس ينتەرنەت-رەسۋرستار بۇقارالىق اقپارات قۇرالدارىنا جاتادى, ال باق سالاسىنداعى ۋاكىلەتتى مەملەكەتتىك ورگان مادەنيەت جانە اقپارات مينيسترلىگى. تيىسىنشە, ينتەرنەت كەڭىستىگىندەگى ءارتۇرلى تىيىم سالىنعان جانە زاڭسىز كونتەنتى بۇعاتتاۋ تىكەلەي مادەنيەت جانە اقپارات مينيسترلىگىنىڭ قۇزىرەتىنە كىرەدى.

«بۇل ينتەرنەت-رەسۋرس امەريكاندىق ينتەرنەت-پروۆايدەرلەرگە تيەسىلى حوستينگ قىزمەتتەرىندە ورنالاستىرىلعان. مىسالى, بۇگىن Kyzdar.net سايتى بۇعاتتالعانىمەن, ەرتەڭ Kyzdar2.net, Kyzdar4.net جانە ت.ب. سىلتەمەلەر جۇمىس ىستەي بەرەدى», – دەلىنگەن حابارلامادا.

سونداي-اق سايتتىڭ جۇمىسىن باسقارعان 11 كۇدىكتىگە قاتىستى ءىس تەرگەۋ ورگاندارىندا سول كەزدەگى زاڭنامادا ولقىلىقتارعا بايلانىستى توقتاتىلعان, اتاپ ايتقاندا, ول كەزدە زاڭدا «تەلەكوممۋنيكاتسيالىق جەلىلەردى, ينتەرنەتتى پايدالانۋ ارقىلى جەزوكشەلىكتى ناسيحاتتاۋ جانە جارنامالاۋ» دەگەن ۇعىم بولماعان.

ىشكى ىستەر مينيسترلىگى بۇل ماسەلە تەك قازاقستاندا عانا ەمەس, باسقا ەلدەردە دە بار ەكەنىن اتاپ ءوتتى. ولاردىڭ ايتۋىنشا, قازىر “ونلاين-جەڭگەتايلىق” كەڭ تاراعان قىلمىستىڭ جاڭا تۇرلەرىنىڭ ءبىرى.

قولدانىستاعى تاجىريبە مەن پروبلەمالىق ماسەلەلەردى ەسكەرە وتىرىپ, 5 قىركۇيەكتە كۇشىنە ەنگەن قىلمىستىق كودەكسكە ءتيىستى تۇزەتۋلەر ەنگىزىلگەن.

ەسكە سالساق, بۇعان دەيىن Kyzdar.net سايتىنىڭ توپ-مەنەدجەرلەرى مەن كومەكشىلەرى ۇستالعانى تۋرالى جازعان ەدىك.