ىشكى ىستەر مينيسترلىگى قوماقتى قارجى ۇرلاعان ەكى قازاقستاندىققا ىزدەۋ جاريالادى

فوتو: اشىق دەرەككوز

ىشكى ىستەر مينيسترلىگى قىلمىستىق توپ قۇرىپ, «Qarmet» اكتسيونەرلىك قوعامىنان اسا ءىرى مولشەردە ۇرلىق جاسادى دەگەن كۇدىكپەن ەكى ادامنىڭ ىزدەستىرىلىپ جاتقانىن مالىمدەدى. بۇل تۋرالى Stan.kz اقپارات اگەنتتىگى حابارلايدى.

ىزدەستىرىلىپ جاتقان ەكى ازاماتتىڭ ءبىرى اباي وبلىسىنىڭ تۋماسى – احمەتجانوۆ ميراس قالىمبەك ۇلى. 1987 جىلى دۇنيەگە كەلگەن ازامات بۇرىن ۇرلىق جاساعانى ءۇشىن سوتتالعان.

ەكىنشىسى – چيجەۆسكي اندرەي الەكساندروۆيچ. 1987 جىلى تۋعان, قوستاناي وبلىسىنىڭ تۋماسى. ەكەۋىن دە بۇلتارتپاۋ شاراسى بويىنشا «قاماۋدا ۇستاۋ» تۋرالى بۇيرىق شىققان.

پوليتسيا ىزدەۋدە جۇرگەن ادامداردىڭ ورنالاسقان جەرى تۋرالى اقپارات بولسا, دەرەۋ مىنا نومىرلەرگە حابارلاۋدى سۇرايدى:

8-705-177-14-19;
8-702-975-62-48;
8-775-299-79-97;
8-7172-72-20-99.

سونىمەن بىرگە استانا قالاسى, تاۋەلسىزدىك داڭعىلى 1 مەكەنجايى بويىنشا ورنالاسقان ءىىم ۇيىمداسقان قىلمىسقا قارسى كۇرەس دەپارتامەنتىنە حابارلاسۋعا بولادى. ىشكى ىستەر مينيسترلىگى انونيمدىلىككە كەپىلدىك بەرەدى.

ايتا كەتەيىك, ىشكى ىستەر مينيسترلىگى اقپاندا Qarmet كەنشىلەرىن بوپسالاپ, قتج-نى توناۋمەن اينالىسقان ۇيىمداسقان قىلمىستىق توپتى قۇرىقتاعان ەدى. ول كەزدە Qarmet اق-نىڭ جۇمىسكەرلەرىمەن اباي قالاسى تۇرعىندارىن بوپسالاعان قىلمىستىق توپتى قۇرىقتاۋدىڭ ەكىنشى كەزەڭى وتكىزىلگەنى حابارلاندى.

ال ءبىرىنشى كەزەڭ وپەراتسياسى جەلتوقساندا جۇرگىزىلىپ, Qarmet كەنشىلەرىن بوپسالاعان قىلمىستىق توپ مۇشەلەرى ۇستالعان. ولاردى تەرگەۋ بارىسىندا ۇيىمداسقان قىلمىستىق توپ قۇرۋ, وعان باسشىلىق جاساۋ جانە قاتىسۋ بويىنشا سوتقا دەيىنگى تەرگەۋ جۇرگىزىلگەن. ناتيجەسىندە جالپى قۇنى 55 ميلليون تەڭگەدەن استام وزگە دە بوپسالاۋ دەرەكتەرى انىقتالعان.

قۇرىقتالعان قىلمىستىق توپ قارۋ قولدانىپ, ءتۇرلى كريمينالدىق جانجالدارعا قاتىسقان. سونىمەن بىرگە قاراعاندى وبلىسىنىڭ اباي اۋدانىنا قاراستى تەمىرجول ستانتسياسىنىڭ جۇكتەرىن ۇرلاعان.