ىشكى ىستەر مينيسترلىگىندە كەڭەيتىلگەن القا وتىرىسى ءوتتى

فوتو: پوليتسيا

بارلىق وڭىرلىك ءبولىنىس باسشىلارىنىڭ قاتىسۋىمەن ءىىم القاسىنىڭ وتىرىسى ءوتتى. جيىندا ءى توقساننىڭ جۇمىسى قورىتىندىلانىپ, الداعى كەزەڭگە باسىم مىندەتتەر ايقىندالدى, دەپ حابارلادى qandastar.kz

ۆەدومستۆو مەملەكەت باسشىسىنىڭ تاپسىرماسى بويىنشا قوعامدا «زاڭ مەن ءتارتىپ» قاعيداتىن نىعايتۋدى جالعاستىرۋدا. 2025 جىل ىشكى ىستەر ورگاندارىندا پروفيلاكتيكا جىلى بولىپ جاريالاندى.

«قابىلدانعان شارالاردىڭ ناتيجەسىندە قىلمىستار سانى 13%-عا ازايدى, ونىڭ ىشىندە كىسى ءولتىرۋ, دەنساۋلىققا اۋىر زيان كەلتىرۋ, ۇرلىق, توناۋ, قاراقشىلىق جانە بۇزاقىلىق سانى تومەندەدى. قوعامدىق ورىنداردا جانە كوشەلەردە جاسالعان قۇقىق بۇزۋشىلىقتار ازايدى», — دەپ جازدى ىشكى ىستەر ءمينيسترى ەرجان سادەنوۆ.

ءۇش توننادان استام ەسىرتكى تاركىلەنىپ, 69 ەسىرتكى زەرتحاناسى جويىلدى.

مال ۇرلىعىنا قارسى ءىس-قيمىل — ۆەدومستۆونىڭ نەگىزگى مىندەتتەرىنىڭ ءبىرى. قىلمىستىڭ وسى ءتۇرىنىڭ الدىن الۋعا, اشۋعا جانە جولىن كەسۋگە باعىتتالعان كەشەندى شارالار قابىلدانۋدا. ناتيجەسىندە سوڭعى بەس جىلدا قازاقستاندا مال ۇرلىعىنىڭ سانى تۇراقتى تۇردە تومەندەپ كەلەدى, ونىڭ ىشىندە جىل باسىنان بەرى 26%-عا ازايدى.

مينيستر ەرەكشە نازار اۋدارۋدى قاجەت ەتەتىن باعىتتاردى دا اتاپ ءوتتى.

«انىقتالعان ينتەرنەت-الاياقتىق فاكتىلەرىنىڭ ءوسۋى تىركەلدى — 5,5 مىڭنان استام دەرەك. بۇل پوليتسيانىڭ بەلسەندى اناليتيكالىق جانە جەدەل جۇمىسىنىڭ دا ناتيجەسى. قىلمىستىق سحەمالاردا پايدالانىلعان 14 مىڭ ينتەرنەت-رەسۋرس جانە 15 مىڭنان استام بانكتىك شوت بۇعاتتالدى.

كەيبىر جاسوسپىرىمدەردىڭ سەبەپسىز اگرەسسيا بەلگىلەرى بار قۇقىققا قايشى ارەكەتتەرىن دە بەي-جاي قالدىرۋعا بولمايدى. وسىعان بايلانىستى جاستارمەن جۇرگىزىلەتىن پروفيلاكتيكالىق شارالاردى كۇشەيتىپ, ءبىلىم بەرۋ مەكەمەلەرىمەن جانە اتا-انالارمەن ءوزارا تىعىز ءىس-قيمىلدى قولعا الۋدى تاپسىردىم», — دەدى ەرجان سادەنوۆ.

جول-كولىك وقيعالارى دا الاڭداۋشىلىق تۋدىرادى. ءۇش ايدا التى مىڭنان استام اپات بولعان. بۇل رەتتە قازا تاپقانداردىڭ سانى 4%-عا تومەندەگەن.

«جول قوزعالىسىنا قاتىسۋشىلاردىڭ ءتارتىبى مەن قۇقىقتىق ساناسىن ارتتىرۋعا باعىتتالعان  شارالاردى جەرگىلىكتى اتقارۋشى ورگاندار مەن جۇرتشىلىقتى بەلسەندى تارتا وتىرىپ, الدىن الۋ جۇمىستارىن كۇشەيتۋ مىندەتى قويىلدى. تەك بىرلەسىپ قانا ءبىز جاعدايدى وزگەرتە الامىز», — دەدى مينيستر.

سونداي-اق ءىىم باسشىسى وڭىرلىك دەپارتامەنت باستىقتارىنا:

• تسيفرلىق تەحنولوگيالار مەن بەينەباقىلاۋ مۇمكىندىكتەرىن بەلسەندى پايدالانۋدى;
• بارلىق اۋداندىق بولىنىستەردە جەدەل باسقارۋ ورتالىقتارىن قۇرۋدى جالعاستىرۋدى;
• قىلمىستاردى, ونىڭ ىشىندە بۇرىن جاسالعانداردى اشۋ ساپاسىن كۇشەيتۋدى;
• جەكە قۇرام اراسىندا زاڭ مەن تارتىپكە ەرەكشە نازار اۋدارۋدى تاپسىردى.