جاڭالىقتار
«ىشتەرىڭ ءبىلسىن ءالۋ-اي…»: زايىتوۆ ۇكىمەت مۇشەلەرىنە اشۋلاندى
ءماجىلىس دەپۋتاتى رينات زايىتوۆ ساۋالدارىنا دۇرىس جاۋاپ الا المايتىنىن ايتىپ, ۇكىمەت مۇشەلەرىنە اشۋلاندى,-دەپ حابارلايدى Qandastar.kz
قۇرمەتتى, تامارا بوسىمبەكقىزى! سەسسيا باسىندا ء“سىز ۋادەلەردىڭ بارىنە ءبارىمىز جاۋاپ بەرەمىز” دەگەنسىز. ارعى جاعىن “ىشتەرىڭىز ءبىلسىن ءالۋ-اي”. ناقتى سايلاۋشىلارمەن بايلانىسقا كەلەيىك. مەن وسى سەسسيادا سىزدەرگە ون ساۋال جولدادىم. سونىڭ ەكەۋىن-اق مىسال ەتەيىن. ۇبت بىلىقتارىنىڭ ءبارىن ايتىپ كەلگەن كەزدە – سىزدەردىڭ شىعارعان شەشىمدەرىڭىز: ءومىرى باسى داۋدان ارىلمايتىن ءابدىراسلىوۆتى اكەپ قويدىڭىزدار. راحمەت! ايتىسكەر اقىندار مەن جىرشى-تەمرەشىلەر وداعىنان عيمارات تۋرالى سۇراق قويىپ ەدىم. ءسىز جەردەن جەتى قويان تاپقانداي “الاتاۋ” ءداستۇرلى تەاترىندا عيماراتى بار دەدىڭىز. بارىپ كورىڭىز, ول 20 شارشى عانا مەتر جەر. وداققا عيمارات دەپ ايتۋ ۇيات, – دەيدى زايىتوۆ.
دەپۋتات مەكتەپتەردە اتا-انالار مەن مۇعالىمدەردەن اقشا جيناپ جاتقانى تۋرالى شاعىم كوبەيىپ كەتكەنىن ايتتى.
بىزگە وقۋ-اعارتۋ مينيسترلىگىنە قاتىستى قازاقستاننىڭ بالەنباي مەكتەبىندە اتا-انالاردان, مۇعالىمدەردەن اقشا جيناپ جاتقانى تۋرالى فاكتىلەر ايتىلىپ, بىرنەشە شاعىم ءتۇستى. مۇنداي اقشا جيناۋ قاي قاۋلىعا, قاي زاڭعا نەگىزدەلگەن?, – دەپ سۇرادى دەپۋتات.
وقۋ-اعارتۋ ۆيتسە-ءمينيسترى ەدىل وسپان دەپۋتات بەرگەن ناقتى فاكتىلەر قۇقىق قورعاۋ ورگاندارىنا جولدانعانىن ايتتى.
ەشقانداي زاڭدا, ەشقانداي قاۋلىدا مەكتەپتەردە اقشا جيناۋ ماسەلەسى قاراستىرىلماعان. بۇل – زاڭسىزدىق. ءسىزدىڭ بۇدان بۇرىن كوتەرگەن ماسەلەلەرىڭىز بويىنشا ءار فاكتىنى جۇمىس تارتىبىندە سىزدەن الدىق, ءتيىستى زاڭ ورىندارىنا جولدايمىز. ءوز تاراپىمىزدان دا وسىنداي جايتتار ءمالىم بولسا, بىردەن قۇزىرەتتى ورگاندارعا جولداپ وتىرامىز, – دەدى ەدىل وسپان.
