«Ishteriń bilsin álý-aı…»: Zaıytov Úkimet múshelerine ashýlandy

Depýtat Úkimet músheleriniń bastapqy bergen sózderin eske salyp, ýádeleriniń oryndalmaı jatqanyn jetkizdi

Qurmetti, Tamara Bosymbekqyzy! Sessııa basynda “siz ýádelerdiń bárine bárimiz jaýap beremiz” degensiz. Arǵy jaǵyn “ishterińiz bilsin álý-aı”. Naqty saılaýshylarmen baılanysqa keleıik. Men osy sessııada sizderge on saýal joldadym. Sonyń ekeýin-aq mysal eteıin. UBT bylyqtarynyń bárin aıtyp kelgen kezde – sizderdiń shyǵarǵan sheshimderińiz: ómiri basy daýdan arylmaıtyn Ábdiraslyovty ákep qoıdyńyzdar. Rahmet! Aıtysker aqyndar men jyrshy-temreshiler odaǵynan ǵımarat týraly suraq qoıyp edim. Siz jerden jeti qoıan tapqandaı “Alataý” dástúrli teatrynda ǵımaraty bar dedińiz. Baryp kórińiz, ol 20 sharshy ǵana metr jer. Odaqqa ǵımarat dep aıtý uıat, – deıdi Zaıytov.

Depýtat mektepterde ata-analar men muǵalimderden aqsha jınap jatqany týraly shaǵym kóbeıip ketkenin aıtty.

Bizge Oqý-aǵartý mınıstrligine qatysty Qazaqstannyń bálenbaı mektebinde ata-analardan, muǵalimderden aqsha jınap jatqany týraly faktiler aıtylyp, birneshe shaǵym tústi. Mundaı aqsha jınaý qaı qaýlyǵa, qaı zańǵa negizdelgen?, – dep surady depýtat.

Oqý-aǵartý vıe-mınıstri Edil Ospan depýtat bergen naqty faktiler quqyq qorǵaý organdaryna joldanǵanyn aıtty.

Eshqandaı zańda, eshqandaı qaýlyda mektepterde aqsha jınaý máselesi qarastyrylmaǵan. Bul – zańsyzdyq. Sizdiń budan buryn kótergen máselelerińiz boıynsha ár faktini jumys tártibinde sizden aldyq, tıisti zań oryndaryna joldaımyz. О́z tarapymyzdan da osyndaı jaıttar málim bolsa, birden quzyretti organdarǵa joldap otyramyz, – dedi Edil Ospan.